Бошқа мавзулар
25 февраль куни Тошкент вақти билан кеч соат 19:40 чамасида, 35 нафар ӯзбекистонлик фуқаролар минган автобус ағдарилиб кетган. Бу каби фожиали воқеа бир йилнинг ўзида учинчиси. Ва яна учаласи ҳам Қозоғистоннинг Оқтўбе вилоятида рўй бермоқда.
«Самара-Чимкент» линияси бўйлаб йўл олган автобусда бўлган ватандошларимиз Россия томон пул топиш мақсадида кетаётган эди. Ахир нимаям қилсин, уйда қуруқ қўл билан ӯтириб. Бирининг бола-чақаси, бирининг кекса ота-онаси бор.
Озодликнинг «қозоқ» редакцияси хабар беришича, ҳалокатдан сўнг касалхонага 9 одам жӯнатилган, уларнинг учтаси аёл киши бўлган. Жароҳат олган кишиларнинг энг ёши 1997 туғилган ва энг каттаси 1961 йилда туғилган кишилар бўлган. Жароҳат олганларга ёрдам кӯрсатилгандан сўнг улар Ўзбекистонга қайтарилиб юборилган.
Бу каби воқеанинг такрорланиши биринчи навбатда бизнинг ҳукуматимизнинг айбидир. Биз айбни четдан излашимиз ноўрин деб ҳисоблайман. Ахир автобусни жўрттага ағдариш кимга керак? Ватандошларимиз четга кетмасалар, автобуслар ҳам йўлда ёнмасди, қишнинг қаҳратон совуғида йўлда қотиб қолмас ва балки ағдарилиб ҳам кетмасди. Шу уч хил ҳолда рўй берган кӯнгилсиз ҳолатга ўз юртимизда сиёсатнинг тўғри тақсимланмаганлиги айби десам муболаға бўлмас.
Қозоғистоннинг маркази Остона шахрида Абу-Даби плаза номли баланд бино қурилиши кетмоқда. Иморат Ўрта Осиёда энг баланд бино бўлиши режалаштирилган. Қурилиш ишларини чет эл компанияси ўз зиммасига олган ва ўз навбатида четдан ишчилар олиб келган. Қурилишда ишлаётган қозоқ фуқаролари билан чет элдан келган ишчилар орасида низо пайдо бўлиб охири катта жанжалга айланган. Буни нима учун айтаяпти дейишингиз мумкин. Бизда ҳам Тошкент Сити қурилиши бошланиш арафасида, лекин лойиҳалаштирувчилар чет элликлар бўлгани сабабли қурилилиш ишларига улар ҳам ўзлари хоҳлаган ишчиларни олиб келишига йўл қўймаслик керак. Шундоғам лойиҳалаштирувчилар пулнинг ярмини олиб кетиши тайин. Ярми ўз юртимизнинг фуқаролари чӯнтагларига қолсалар ёмон бўлмасди.
Шунда четга чиқиш статистикаси хам сал камаярмиди?! Автобус каби воқеалар бўлмасмиди? Ватандошларимиз ҳам ўз оилалари кўз олдида юрарди.
Муаллиф: Нур Дӯст
