Ўқитувчиларнинг мажбурий меҳнатга жалб қилинишига шу вақгача кўз юмиб келган Халқ таълим вазирлиги тизимдаги муаммоларни ёритган блоггерларни рағбатлантирмоқчи. Ўзбекистонда 12 апрел куни бошланган блоггерлар чемпионатига Халқ таълими вазирлиги ҳам ҳомий сифатида қўшилган.
Xabar.uz нинг ёзишича, вазирлик “Халқ таълими тизимидаги муаммолар ва уларнинг ечимлари таҳлил қилинган энг яхши блогпост” номинациясини жорий қилди.
“Таълим соҳасидаги муаммоларни аниқ мисоллар билан очиб бериш ва уларнинг ечимларини таклиф этишига, умумтаълим мактаблари фаолиятига инновацион янгиликларни, ривожланган давлатларнинг синовдан ўтган тажрибаларини жорий қилиш, бир сўз билан айтганда, таълим сифатинини оширириш бўйича илгари сурилган таклифларга алоҳида аҳамият берилади”, – дейилади хабарда.
Ғолиблар Халқ таълими вазирлиги ахборот хизмати томонидан аниқланади ва уларга эсдалик совғалари берилади.
Вазирлик томонидан тайинланган совғанинг нималиги ва миқдори ҳақида ҳеч нарса дейилмаган.
Халқ таълими вазирлиги Ўзбекистонда муаммоларни рўйи-рост очиб берувчи журналист ва блоггерларга шу вақтгача тоқатсиз бўлганлиги айтилади.
Вазирлик тизимидаги ўқитувчиларни металлалом йиғишга, пахта терими ва бошқа мажбурий меҳнатга жалб қилинишлар ҳақида ёзган блоггер ва журналистлар шу вақтгача тақдирланмаган.
Аксинча, марказий телеканаллар орқали ўтказилган кўрсатувларда вазирлик масъуллари томонидан улар танқид остига олинган.
Бироқ Шавкат Мирзиёевнинг 13 апрель Сирдаёр вилоятига ташрифи давомида қилган тарихий нутқи юқори тизимдаги амалдорларнинг журналистларга нисбатан муносабатини кескин ўзгартиргани айтилади.
Ўзбекистон президенти ўзининг ташрифи муносабати билан жойларда йўл қўйилаётган кўзбўямачиликларни кескин танқид қилган ва ўқитувчи ва шифокорларнинг мажбурий меҳнатга жалб қилиниши очиқ қоралаганди.
Шундан сўнг видеоселектор мажлиси ўтказган Бош вазир Абдулла Арипов бундай иллатларни йўқотишда журналистлардан ёрдам беришни илтимос қилганлиги ҳақида ёзилди.
“Бош вазир Абдулла Арипов бундай иллатларни йўқотишда, бу иллат мамлакатни шарманда қилишини тушунмайдиган раҳбарларни “қулоғидан тортиб, офтобга чиқаришда ҳамкор бўлишни” илтимос қилди. “ОАВ вакиллари ёрдам беришларини илтимос қиламиз”, деди Бош вазир. Ёқаркан”, – деб ёзди дарё.уз нашри муҳаррири Муҳрим Аъзамхўжаев.
Мажлисда иштирок этган ва мажбурий меҳнатга эътиборсизлиги учун хайфсан олган Халқ таълими вазири Улуғбек Иноятов мажбурий меҳнатни ватанпарварлик деб ҳисоблаб юрганини айтган эди.
Бироқ шундай бўлса-да, Ўзбекистондаги барча амалдорлар журналистларни ўзига ҳамон ёрдамчи сифатида билмаслиги кузатилади.
14 апрел куни журналистлар учун матбуот анжумани ташкил қилган Ўзбекистон мусулмонлари идорасининг раиси, муфтий Усмонхон Алимов хориждаги журналистларни фитначига тенглаштирган. Муфтий бу каби журналистларга чора кўришга чақирган.
“Вазиятни аниқ била туриб нохолис ахборот тарқатиш ўта адолатсизлик, ҳозир бунақалар кимнинг тегирмонига сув қуяётганини билмайди, хориждаги фитначи ОАВларнинг иши фитна-фасод, лекин ўзимиздаги сайтларнинг бу ишга бош қўшаётгани хатарлидир, буларга вақтида жавоб бериб чорасини кўриш керак”, – дея Усмонхон Алимов иқтибос келтирган хабар.уз сайти.
Ўзбекистонда блоггерлар чемпионати деярли ҳар йили анъанвий тарзда ўтказилиб келинади.
Бу йилги чемпионатнинг умумий мукофот жамғармаси 60 миллион сўмни ташкил қилади.
Манба: BBCUZBEK.COM