Бошқа мавзулар
Ўзбек киноси оқсоқоли¸ СССР халқ артисти¸ СССР давлат мукофоти лауреати¸ кинорежиссер Шуҳрат Аббосов 25 апрель куни Тошкент вақти билан оқшомги соат 6 ларда 87 ëшида оламдан ўтди.
“Маҳаллада дув-дув гап”¸ “Сен етим эмассан” фильмлари билан танилган Аббосов¸ 24 апрель куни оғир аҳволда Тошкентдаги 1-ҳукумат стационари реанимация бўлимига олиб келинган эди.
Киночининг ўғли Элжон Аббосов Озодлик билан 25 апрель куннинг биринчи ярмида қилган суҳбатида миллий кино дарғасининг ҳозирги ҳолидан давлат мулозимлари хабар олмаëтганини билдирган эди.
– Отам ўлмоқда¸ аммо мулозимлар xабаримизни ҳам олмаяпти. Отам ўлганидан кейин улар некрологларга имзо чекиб, таъзия билдиришганининг кераги ҳам йўқ. Ҳозир эътибор беришсин¸ отам ўлим тўшагида, сўнгги нафасини олаëтган пайтда келиб ҳол-аҳвол сўрашсин¸ деган эди Озодликка таниқли киночининг ўғли унинг ўлимидан саноқли соатлар олдин.
1931 йилнинг 16 январида Қўқонда таваллуд топган Аббосов1949 йилда Тошкент Тиббиёт техникумини тамомлаган. 1954 йилда А.Н.Островский номли Тошкент Театр ва рассомчилик санъати институти (ҳозирги Маннон Уйғур номидаги Театр санъати институти), 1958 йилда эса “Мосфильм” студияси қошидаги Олий режиссёрлик курсларида таҳсил олган.
Аввалига Янгийўл драма театрида бош режиссёр, 1959 йилдан бошлаб “Ўзбекфильм” киностудияси режиссёри бўлиб ишлаган.
Шуҳрат Аббосов суратга олган “Маҳаллада дув-дув гап” (1960), “Сен етим эмассан” (1963), “Тошкент-нон шаҳри” (1968), “Оловли йўллар” (1977-1983), “Катта урушдаги кичик одам” (1990) каби фильмлар совет киносининг мумтоз намуналари сифатида Россия кино академияси олтин фондига киритилган.
Манба: ozodlik.org
