Бошқа мавзулар
Ўзбекистонда хорижда яшаётган ўзбекистонликлар билан ҳамкорликка оид давлат сиёсати концепцияси ишлаб чиқилди.
Ташқи ишлар вазирилиги сайтида берилган хабарга кўра, “Хорижда истиқомат қилаётган ватандошлар билан ҳамкорлик бўйича Ўзбекистон Республикаси давлат сиёсати Концепцияси” лойиҳаси вазирлик томонидан ишлаб чиқилган.
Расмий хабарда: “Хорижий мамлакатларда истиқомат қилаётган ватандошлар билан мулоқотни ва самарали ҳамкорликни ривожлантириш Ўзбекистон Республикаси президенти Шавкат Мирзиёев томонидан мамлакат ташқи сиёсатининг устувор йўналишларидан бири сифатида белгиланган”, дейилади ТИВ хабарида.
Аммо, расмий хабарда хориждаги ватандошлар билан ҳамкорлик қай йўсинда олиб борилишига оид аниқ маълумот берилмаган.
Ташқи ишлар вазирлиги лойиҳа матни Норматив ҳуқуқий ҳужжатлар лойиҳаларининг муҳокамаси порталида (www.regulation.gov.uz) жамоатчилик муҳокамасига қўйилганини эълон қилди, аммо 15 июнь – ушбу хабар ёзилаётган кезда порталдан ушбу ҳужжат матни топилмади.
Манба: ozodlik.org
