Жалақудуқда 7 ва 3 ёшдаги боласи билан ўзини дарёга ташлаган аёл тирик қолди, болалар ўлди

Андижон вилоятида яшовчи аёл икки фарзанди ва ўзини ўлдиришга ҳаракат қилди.

Бош прокуратуранинг билдиришича, Жалақудуқ тумани турғуни бўлган ёш аёл 7 ёшли ўғли ва 3 ёшли қизини ўзига арқон билан боғлаб Шаҳрихонсой каналига ташлаган. Воқеа 25 июнь куни соат эрталабки ўн яримларда содир бўлган.

Канал бўйидан ўтаётган йўловчилар каналдан аёлни қутқариб чиқишган, бироқ унинг ўғли ва қизи сувга чўкиб кетган.

Жалақудуқ туман прокуратураси томонидан бу аёлга нисбатан Жиноий кодексининг 97 -моддаси “в” банди (Айбдорга аён бўлган ожиз аҳволдаги шахсни қасддан ўлдириш) асосида жиноят иши қўзғатилган. Айни дамда тергов ишлари олиб борилмоқда.

Манба: Ozodlik.org