Бошқа мавзуларБеш маротаба турли халқаро танловлар ғолиби бўлган чемпион бола, бугун олис бир қишлоқ кулбасида аранг кун кўрмоқда.
Иқтидорли болалар юртимизнинг келажагидир. Уларга сарфланган харажат эртага, албатта, ўз мевасини беради. Сир эмаски, баъзида юксак иқтидорли болалар оилавий шароитлари туфайли ўзларини намоён эта олмай, иқтидорларини ривожлантира олмасдан чекка қишлоқларда қолиб кетмоқда.
Бухоро вилоятининг Қоракўл туманидаги 52-мактабнинг 9-синфида бир неча бор математика бўйича халқаро чемпионатлар ғолиби Дониёр Исмоилов таҳсил олади. У икки бора олтин ва уч маротаба кумуш медаль соҳиби бўлган.
Аммо шундай иқтидор эгаси бугун оилавий қийинчилик туфайли вақтини тўлиқ илм олишга сарфлай олмаяпти. У бўш вақтларида ва ёзги таътилда нон цехларида ишлаб оиласига ёрдам қилади.
Дониёр Қоракўл туманининг “Қораун” қишлоғида яшайди. У яшаётган кулбани уй дейишга ҳам тил бормайди. Оила моддий ёрдамга муҳтож. Дониёрнинг онаси бир неча йиллардан бери жигар церрозидан азият чекади, тиббий муолажа ва дори-дармон маблағи йўқ, отасининг эса тайинли иш жойи. Шунга қарамасдан Дониёрни халқаро олимпиадаларда иштирок этишга тавсия этишса, унинг ота-онаси қариндош-уруғларидан қарз кўтаради. Баъзида ишлашга мажбур бўлган Дониёр олимпиадаларда иштирок эта олмайди.
“Шундай танг аҳволда қолган оила билан шу вақтгача “Уйма-уй юриб муаммо ўрганяпмиз”, дейдиган депутатлар, бошқа мутасаддилар ва Ёшлар иттифоқининг Бухоро вилояти кенгаши қизиққанмикан?“ деган савол ҳаёлингдан ўтиши табиий.
Дониёр Исмоиловни сайтга олиб чиқишдан мақсадимиз биргина – унинг мисолида юртимиздаги бошқа вилоятларнинг ҳам чекка қишлоқларида моддий камчилик туфайли ўз иқтидорини намоён қила олмаётган болаларга Ёшлар иттифоқининг диққатини қаратиш. Зеро, иттифоқнинг асл мақсади ҳам шундай ёшларга кўмаклашиш бўлиши керак. Бундай ёшларни излаб, уларни ижтимоий ҳимояга олиш тадбир ўтказишдан кўра, кўпроқ фойдали ва келажакда ўз мевасини бериши аниқ.
