Бошқа мавзуларGM Uzbekistan сентябрь ойида ҳам Россияда бирорта автомобиль сотмади. Августда ҳам, июлда ҳам, июнда ҳам Россияда бирорта Ravon сотилмаган эди. Умуман, Россияда янги ўзбек автомобиллари сўнгги бор 2018 йил май ойида сотилган (508 дона).
Нега бундай бўляпти? Камида уч сабаб бор: биринчиси, GM Uzbekistan Россия бозори учун нархларни қайта кўриб чиқяпти (ҳа, тўрт ойдан бери); иккинчиси, компаниянинг бизнес-модели сезиларли ўзгартириляпти (ва шунга ўхшаш чиройли гаплар); учинчиси, ҳозир Россияда машина сотиш GM Uzbekistan’га фақат зарар келтиради («Ўзавтосаноат» раҳбари айтган дангал сабаб шу).
GM Uzbekistan «нархларни қайта кўриб чиқиш» баҳонасида савдоларни нисбатан узоқ вақт тўхтатиб қўйиш тажрибасига эга. Масалан, Ўзбекистон бозори учун айрим машиналар нархини 7,7 фоизга оширишдан аввал 24 кун давомида машина сотмади. Ҳа, ақлбовар қилмайди, лекин шунақаси ҳам бўлиши мумкинлигини GM Uzbekistan исботлади ахир.
Россияда тўрт ойдан бери, Ўзбекистонда августнинг 24 куни давомида бирорта машина сотмагани билан, кейинги ҳафталар давомида компания Ўзбекистондаги харидорларини асосан хурсанд қиляпти. Ишлаб чиқариш ҳажмини ҳам оширяпти, «шапка»ларга қарши курашяпти, машиналарни ҳам икки ойлаб кутдирмасдан тарқатишга уриняпти.
