Бошқа мавзуларАНГОР ЭЧКИСИ – эчкининг қимматли сержун зоти. Ангор эчкисининг ватани Туркманистоннинг ғарби. Туркманларнинг бир қисми 13-асрда бу ердан Кичик Осиёга кўчиб борган ва натижада ҳозирда Туркиянинг Ангора (Анқара) вилояти Ангор эчкисини урчитиш марказига айланган.
Бу зотнинг Ангор эчкиси деб аталиши ҳам шундан келиб чиққан. 19- асрдан АҚШ, Африкадаги айрим мамлакатлар, Австралияда боқилади. Ангор эчкисининг жуни майин, оқ, товланувчан, ғоят эгилувчан ва пишиқ (уз. 18 — 25 см). Такалари ўрта ҳисобда 50 — 55 кг келади, йилига 5 — 7 кг жун беради, урғочилари 32 — 36 кг га боради, 3,1 кг жун беради. 65 — 70% тоза жун чиқади. Ҳар юз бош Ангор эчкисидан йилига 105 улоқ олинади. Соғин эчкидан 70 — 100 кг сут соғиб олиш мумкин, ёғлик даражаси 4,2 — 4,4%. Ўзбекистон (Поп тумани)га 1936 йилда АКШнинг Техас ва Нью-Мексика штатларидан келтирилган Ангор эчкисини жайдари эчкилар билан чатиштириб сержун эчки зоти яратилди (1962). Ангор эчкиси Ўзбекистонда, асосан Наманган, Андижон вилоятларида боқилади.
Манба:ЎзМЭ
