Бошқа мавзулар«Ариққа ўзимиз тушиб олгандик», «Кесакни ўзимиз кўтариб олгандик», «Милиционерларга раҳмат! Ўғлимни милиционер ураётгани акс этган видеони тарқатганни эса жазолашларингни хоҳлайман» туркумига оид янгилик. Андижон давлат университети талабалари ректор Акрамжон Йўлдошев номига салкам инновацион ариза ёзишяпти. Аризада шундай дейилади:
«Мени 2019 йилда юртимизда ва жаҳонда бўлаётган сиёсий-ижтимоий жараёнлардан доимо хабардор бўлиб боришим, шунингдек, уларда фаол иштирок этишим учун 2019 йил январь ойи стипендиямдан 60 минг сўмни обуна учун ҳисобхона томонидан ушлаб қолишга рухсат беришингизни сўрайман».
Зўр-а? Ҳаммаси қонуний — университет талабадан обунага пул сўрагани ё мажбурлагани йўқ, талабанинг ўзи, ўз хоҳиши билан пулини обунага бермоқчи. Мана, аризаси ҳам турибди. Фақат бу бечора талаба нимага обуна бўлаётганини ҳам билмайди, @trolluz ёзганидек — газетагами, журналгами, сайтгами ё шунчаки ҳавогами?
Бу обуна балоси қачон тугайди ўзи? Мажбурий обуна ҳисобидан кун кўраётган газета/журналлар, уларнинг раҳбарлари, ходимлари мана шундай хат-хабарларни кўришганида, сал бўлса-да уялишармикин? Қачонгача ўқитувчи-ю пенсионер, талаба-ю шифокорнинг чўнтагига осиласиз?
