Қуатбой Абдреимов

АБДРЕИМОВ Қуатбой (1937.24.5, Қорақалпоғистон, Тахтакўпир тумани) — қорақалпоқ актёри ва режиссер Ўзбекистон халқ артисти (1974). Тошкент давлат санъат институтини тугатган (1963).

Қорақалпоқ телевидениесида режиссери (1963-68), бош режиссер (1968-71), Қорақалпоқ театрида директор ва бош режиссер (1973-79), 1979 йилдан режиссер Саҳналаштирган асарлари: «Отелло» (У.Шекспир, Отелло ролини ўзи ижро этган), «Момо ер» (Ч.Айтматов), «Абу Райҳон Беруний» (Т.Сейтжанов), «Бердақ» (Ж.Оймурзаев), «Билмайин босдим тиконни» (И.Султон), «Темир хотин (Ш.Бошбеков),«Эрназар олакўз» (А.Ўталиев) ва бошқалар. Абдреимов биринчи қорақалпоқ кино актёри. «Ўзбекфильм ва «Қозоқфильм» киностудияларида ишланган 20 дан ортиқ фильмларда суратга тушган : Алижон («Ҳамза»), Эргаш («Оталар васияти»), Валижон («Афсонадаги қиз»), Зарипбой («Бўйсунмас») ва бошқалар.

Бердақ номидаги Қорақалпоғистон Давлат мукофотининг лауреати (1973). «Эл-юрт ҳурмати» ордени билан мукофотланган (1999).

Манба:ЎзМЭ