Бошқа мавзуларМухолифатдаги «Бирдамлик» ХДП аъзоларининг партиямиз фаоли, айни кунда Тошкент шаҳар ИИББнинг Яшнобод тумани Чашма кўчасида жойлашган ва халқ тилида «Панельний қамоқхонаси» деб аталадиган изоляторида тутқинликда сақланаётган Нафосат Оллошукурова билан учрашишга уринишлари иккинчи куни, иккинчи марта самарасиз якун топди. Муассаса қўриқчилари, навбатчи қоровуллар Партия котиби Қаҳрамонхон Маҳмуд, Бошқарув кенгаши аъзолари Дилором Исҳоқова, Рўзибой Азимийларнинг Нафосат Оллошукурова билан учрашишларига рухсат бермади. Ҳатто фаолларнинг Нафосат Оллошукурова учун олиб борган гигиеник воситалари ҳамда озиқ-овқат маҳсулотларини қабул қилишдан бош тортди. Улар муассаса қонун-қоидаларига биноан фақат кийим-кечак қабул қилиниши мумкинлигини, муассаса томонидан уч маҳал иссиқ овқат берилаётганини билдириб, ҳатто Н. Оллошукуровага ёзган бир парча очиқ хатни ҳам қабул қилишмади. Фаолларнинг «Оллошукурова қачон озодликка чиқарилади», деган саволига муассаса ходимлари: «ўзи кеча келган бўлса, сизлар қачон чиқишини сўрайсизлар, ҳали-вери чиқмайди», деб ўта совуққонлик билан жавоб қайтарди.
Эслатиб ўтамиз, Нафосат Оллошукурова шу йилнинг 9-январь куни ўзига қарши уюштирилаётган ноҳақликларга, адолатсизликларга, таъқибу босимларга чидай олмай бир гуруҳ аёллар билан Президент қабулхонаси ёнида намойиш ўтказганди. Биринчи куни президент админстрацияси уларнинг норозилик намойишига ҳеч қандай эътибор бермагач эртаси куни яна намойишга чиққандилар. Иккинчи кунги норозилик намойиши ўтказилаётган чоғда уларни Тошкент шаҳар Яккасарой туман ИИБ ходимлари ҳибсга олиб, жаримага тортганди, Нафосат Оллошукуровани эса 5 суткалик қамоқ жазосига ҳукм этганди.
Нафосат Оллошукуровани 5 суткалик қамоқ жазосига маҳкум этишда Тошкент шаҳар ИИБ ходимлари, ҳуқуқшунослар Ўзбекистон Республикасининг Конституциясига хилоф равишда иш тутиб, қўпол хатога йўл қўйди. Бош Қомусимизнинг 33-моддасида «Фуқаролар ўз ижтимоий фаолликларини Ўзбекистон Республикаси қонунларига мувофиқ митинглар, йиғилишлар ва намойишлар шаклида амалга ошириш ҳуқуқига эга» дейилган.
Ўзбекистон Республикасининг Маъмурий жавобгарлик тўғрисидаги кодекснинг Маъмурий жазо деб номланган III бобига, аниқроғи, Маъмурий қамоққа олиш деб номланган 29-моддасига эътибор қаратамиз. «Маъмурий қамоққа олиш уч суткадан ўн беш суткагача муддатга, фавқулодда ҳолат тартиби шароитида эса, жамоат тартибига тажовуз қилганлиги учун — ўттиз суткагача муддатга қўлланилади. Маъмурий қаммоқа олиш туман (шаҳар) судининг маъмурий ишлар бўйича судьяси томонидан, фавқулодда ҳолат тартиби шароитида эса, шунингдек ҳарбий комендант ёки ички ишлар органи бошлиғи томонидан белгиланади. Маъмурий қамоққа олиш чораси ҳомиладор аёлларга, уч ёшгача боласи бўлган аёлларга, ўн тўрт ёшгача бўлган боласини якка ўзи тарбиялаётган шахсларга, ўн саккиз ёшга тўлмаган шахсларга, биринчи ва иккинчи гуруҳ ногиронларига нисбатан қўлланилиши мумкин эмас»…
Бизнингча, Нафосат Оллошукуровани 5 суткага маъмурий қамоққа олувчилар ўз касбининг малакали мутахассислари эмас, балки отасининг пули ёрдамида ўқишни бир амаллаб тугатиб, ёки диплом сотиб олиб, телба-тескари фаолият юритаётган ёки юқоридагиларнинг топшириғини сўзсиз бажаришга иштиёқманд «профессионал кадрлар» бўлиши керак. Чунки малакали кадрлар ўз ҳақ-ҳуқуқини талаб қилиб намойишга чиққан ва фарзандлари икки-уч ёш бўлган аёлларни мавжуд қонунларга хилоф равишда қамоққа маҳкум қилишга ҳар доим ҳам журъат эта олмайди. Ҳа, Нафосат Оллошукуровани қамоққа олган ички ишлар органи қилмишларига яраша жавоб бериши керак. Биз халқаро ҳамжамиятдан ҳуқуқи поймол бўлган собиқ инглиз тили ўқитувчиси Нафосат Оллошукурова билан рўй берган воқеага эътибор қаратишларини илтимос қиламиз. Тошкент шаҳар Яккасарой туман ИИБ ва судининг Нафосат Оллошукурова иши билан шуғулланган олғир кадрлар Оллошукуровага етказилган моддий, руҳий, маънавий, иқтисодий зарарларни тўлаши шарт ва зарур, деб ҳисоблаймиз. Уларнинг бундай ҳаракатларига боқибеғам муносабатда бўлиш бошқа яна кўплаб қурбонлар пайдо бўлишига олиб келади.
«Бирдамлик» ХДПнинг Матбуот Маркази
