Ўзбекистонда VPN’дан фойдалангани учун жиноий жавобгарлик белгиландими?

Ўзбекистон Республикасининг 2018 йил 22 октябрдаги ​«Ўзбекистон Республикасининг айрим қонун ҳужжатларига жамоат хавфсизлигини таъминлашга қаратилган ўзгартиш ва қўшимчалар киритиш тўғрисида»ги қонуни билан телекоммуникация тармоғидан қонунга хилоф равишда (рухсатсиз) фойдаланганлик (2787-модда) учун жиноий жавобгарлик белгиланди. Ушбу модда нимани англатади? Бу интернет фойдаланувчисининг VPN иловасидан фойдалангани жавобгарликни назарда тутадими?

Иллюстратив фото

Ўзбекистон Республикасининг ​«Норматив-ҳуқуқий ҳужжатлар тўғрисида»ги Қонунининг 43-моддасига мувофиқ Ўзбекистон Республикасининг Конституцияси ва қонунлари нормаларига расмий шарҳ Ўзбекистон Республикаси Конституциявий суди томонидан берилади.

Шу туфайли Жиноят кодексининг 2787-модда (телекоммуникация тармоғидан қонунга хилоф равишда (рухсатсиз) фойдаланиш)си юзасидан илмий-назарий тушунтириш учун Тошкент давлат юридик университетига мурожаат қилдик.

​«2787-модда икки қисмдан иборат. Мазкур модданинг биринчи қисмига кўра ўрнатилган ҳимоя тизимларини четлаб ўтган ҳолда телекоммуникация тармоғидан фойдаланиш ва халқаро трафикни ўтказиш мақсадида телекоммуникация тармоғидан қонунга хилоф равишда (рухсатсиз) фойдаланиш, шунингдек мазкур мақсадлар учун мўлжалланган махсус дастурий ёки аппарат воситаларини қонунга хилоф равишда (рухсатсиз) сақлаш ва уларнинг фаолият кўрсатиши учун шароитлар яратиш энг кам ойлик иш ҳақининг юз бараваридан уч юз бараваригача миқдорда жарима ёки бир йилдан уч йилгача озодликни чеклаш ёхуд уч йилгача озодликдан маҳрум қилиш билан жазоланади.

1999 йил 20 августдаги 822-I-сонли Ўзбекистон Республикасининг ​«Телекоммуникациялар тўғрисида»ги қонунда «телекоммуникациялар», ​«телекоммуникациялар тармоғи» тушунчаларига таъриф берилган.

Унга мувофиқ телекоммуникациялар – сигналлар, белгилар, матнлар, тасвирлар, товушлар ёки ахборотнинг бошқа турларини ўтказгичли, радио, оптик ёки бошқа электрмагнит тизимларидан фойдаланган ҳолда узатиш, қабул қилиш, қайта ишлаш; телекоммуникациялар тармоғи эса – узатишларнинг бир ёки бир неча турини: телефон, телеграф, факсимиль турларини, маълумотлар узатиш ва ҳужжатли хабарларнинг бошқа турларини, телевизион ва радиоэшиттириш дастурларини трансляция қилишни таъминловчи телекоммуникация воситаларининг мажмуини англатади.

Қуйидаги қилмишлар Жиноят кодекси 2787-моддаси билан жавобгарликка тортилиши мумкин:

– фойда кўриш мақсадида қонунга хилоф равишда халқаро сўзлашувларни ташкил этиш;

– ўрнатилган ҳимоя тизимларини четлаб ўтган ҳолда халқаро трафикни давлатлараро узатиш;

– халқаро телефон тармоғини четлаб ўтган ҳолда трафикни ўтказиш йўли билан ғайриқонуний халқаро телефон алоқасини ташкил этиш учун Интернетдан фойдаланиш;

– ўрнатилган ҳимоя тизимларини четлаб ўтган ҳолда телекоммуникация тармоғидан фойдаланиш;

– телекоммуникация тармоғидан қонунга хилоф равишда (рухсатсиз) фойдаланишга мўлжалланган GSM, IP, SMS-шлюзлар ва шу каби махсус дастурий ёки аппарат воситаларини қонунга хилоф равишда (рухсатсиз) сақлаш ёки уларнинг фаолият кўрсатиши учун шароит яратиш ва бошқалар.

Одатда, телекоммуникация тармоғидан қонунга хилоф равишда (рухсатсиз) фойдаланилганда GSM, IP ва SMS-шлюзлардан фойдаланилади. Бундай шлюзлар тушунчаси Ўзбекистон Республикаси Ахборот технологиялари ва коммуникацияларини ривожлантириш вазирининг

2018 йил 21 майдаги 173-сонли буйруғи билан тасдиқланган ​«Маълумотлар узатиш тармоғи, шу жумладан Интернет хизматларини кўрсатиш қоидалари»да келтирилган:

– GSM-шлюз – мобил алоқа тармоқлари ва телекоммуникацияларнинг бошқа тармоқлари ўртасида трафикни ўтказиш учун мўлжалланган аппарат-дастурий восита;

– IP-шлюз – IP тармоқлар ва телекоммуникацияларнинг бошқа тармоқлари ўртасида трафикни ўтказиш учун мўлжалланган аппарат-дастурий восита;

– SMS-шлюз – мобил телефондан фойдаланмасдан SMS хабарлар жўнатиш ва олиш имконини берадиган аппарат-дастурий восита.

2787-модданинг иккинчи қисмида оғирлаштирувчи ҳолатлар белгиланган. Яъни, сўз юритилаётган қилмишни бир гуруҳ шахслар томонидан олдиндан тил бириктириб, такроран ёки хавфли рецидивист томонидан, шахснинг ўз хизмат мавқеидан фойдаланиб, шунингдек уюшган гуруҳ томонидан ёки унинг манфаатларини кўзлаб содир этилиши энг кам ойлик иш ҳақининг уч юз бараваридан олти юз бараваригача миқдорда жарима ёки уч йилдан беш йилгача озодликни чеклаш ёхуд уч йилдан беш йилгача озодликдан маҳрум қилиш билан жазоланади», – дейилади ТДЮУ расмий вакили Kun.uz’га тақдим этган маълумотда.

Эслатиб ўтамиз, электрон техника воситалари ёрдамида ноқонуний равишда халқаро алоқа хизмати кўрсатиш билан шуғулланаётган шахсларнинг фаолияти фош бўлгани ҳақида аввал ҳам хабарлар берилганди. Балки муҳокаматалаб масалалар юзасидан Ўзбекистон Конституциявий суди расмий шарҳлар бериб бориш амалиётини кўпайтирар.

Манба:Кун.уз

Бўлишинг:

Муҳаррир танлови

Паолага кўрсатилган мулозамат ўзбекларга қачон кўрсатилади?

24 ёшли атлет, мексикалик қиличбоз Паола Плиегога Ўзбекистон фуқаролиги берилганлиги тўғрисидаги хабарни ўқиб, рости хўрлигим келиб кетди.  Олдиндан айтиб қўяй, менда ...

Ўзбекистонда расман 800 минг киши 500 минг сўм ойликка ишлайди. уларнинг конвертда қанча олиши — номаълум

Ўзбекистон молия вазири ўринбосари Дилшод Султоновнинг сўзларига кўра, Ўзбекистонда биринчи тоифадаги 800 минга яқин ишчи 500 минг сўм атрофида минимал ойлик маош олади. ...

Ўзбек жангчиси билан бўлган жанжални ўзбекистон ва қирғизистон тив раҳбарлари муҳокама қилди

18 август куни Қирғизистоннинг Ўш вилояти Қорасув шаҳрида ММА бўйича бўлиб ўтган WEF PROFFIGHT мусобақасида содир бўлган воқеа юзасидан интернет маконида пайдо бўлган ...


Warning: Missing argument 2 for _x(), called in /home/npzfqf3cbnqn/public_html/mulkdor.com/wp-content/themes/mulkdornew/inc/functions/theme_functions.php on line 1213 and defined in /home/npzfqf3cbnqn/public_html/mulkdor.com/wp-includes/l10n.php on line 399

Notice: Undefined variable: context in /home/npzfqf3cbnqn/public_html/mulkdor.com/wp-includes/l10n.php on line 400