Бошқа мавзуларЎзбекистон Бандлик ва меҳнат муносабатлари вазирлиги «Sizdan Telegram» Telegram-каналида эълон қилинган Қашқадарё вилояти Ғузор туманида мактаб ўқувчиларининг йўл ва ариқларни тозалашга мажбурлангани тўғрисидаги хабарга муносабат билдирди, деб ёзади «Газета.uz» нашри.
Вазирлик матбуот хизматининг хабар қилишича, Қашқадарё вилояти Бандлик бош бошқармаси Давлат меҳнат инспекцияси томонидан роликда кўрсатилган ҳолат жойига чиққан ҳолда текширилди.
Текшириш якунлари бўйича мактаб ўқувчиларини ободонлаштириш ишларига жалб қилгани учун 75-сонли мактаб директори Мусулманов Бахриддин Маъмурий жавобгарлик тўғрисидаги кодекснинг 51-моддаси 2-қисми (вояга етмаганларга нисбатан меҳнатга мажбурий тарзда мажбурлов) билан маъмурий жавобгарликка тортилиб, унга нисбатан ЭКИҲ 5 баравари миқдорида жарима қўлланилди.
Шунингдек, инспекция томонидан Қашқадарё вилояти халқ таълими бошқармасига қонун бузилишини бартараф этиш ва келгусида шу каби камчиликларга йўл қуймаслик юзасидан тақдимнома киритилди.
