Жанубий Кореяга никоҳ (F-6 — Корея Республикаси фуқароларига турмушга чиққан хорижликларга берилади) визаси билан келган Ўзбекистон Республикаси фуқароси Қ.Н. ўз жонига қасд қилган. Бу ҳақда телеграмдаги Жанубий Кореяда истиқомат қилувчи ўзбеклар ҳаётини ёритишга ихтисослашган “Ovoza” канали ёзмоқда.
Марҳумнинг жасади шу йилнинг 30 июнь, якшанба тонгида Жанубий Кореянинг, Хвасонг шаҳрида аниқланган. Хабарда ёзилишича, мазкур ҳодисага Жанубий Кореяда фаолият кўрсатувчи “Юлдузли онлар” юридик фирмаси томонидан аниқлик киритилган ва хабарнинг ҳаққонийлиги тасдиқланган.
Маълумотларга кўра, марҳум Қ.Н. 1996 йилда, Тошкент вилояти, Оққўрғон туманида туғилган. Жанубий Кореяга 2018-йилда турмуш визаси билан келган. Ҳозирча машъум воқеанинг сабаб ва тафсилотлари ёритилгани йўқ.
Айтиш жоизки, сўнгги йилларда Жанубий Кореяга никоҳ визаси билан келаётган муҳожир келинлар аксарият ҳолларда жинсий зўравонлик ва турли қийноқларнинг қурбони бўлишмоқда.
Айни пайтда марҳуманинг яқин қариндошлари майитни юртимизга қайтаришда Жанубий Кореядаги ватандошларимиздан ёрдам сўраб мурожаат қилишган.