13-июль куни Сомалининг Кисмайо шаҳрида жойлашган меҳмонхонада бомба портлаши ва ундан сўнг содир бўлган отишмалар оқибатида 26 киши ҳалок бўлди.
Бомба портлаган меҳмонхонада маҳаллий амалдорлар ва оқсоқоллар ўтказилиши режалаштирилаётган минтақавий сайловларни муҳокама қилаётган бўлган.
Сўнги маълумотларга қараганда ҳалок бўлганлар орасида Кения, АҚШ, Буюк Британия ва Танзания фуқаролари бўлган. Шунингдек маҳаллий сайловларда иштирок этаётган номзод ва икки журналист: сомалий-канадалик журналист Ходан Налейя (Integration TV асосчиси) ва Мухаммад Сахал Умар (SBC TV репортер).Шунингдек 56 киши жабрланган, улар орасида Хитой фуқаролари ҳам бор, деб Reuters ахборот агентлиги хабар беради.
Ҳужум бўйича масъулиятни «Ал-Қоида» тармоғига алоқадор аш-Шабаб экстремистик гуруҳи ўз бўйнига олди.
«Аввалига биз бомбани портлатдик, шундан сўнг қуролланган мужоҳидлар меҳмонхонага бостириб кирди. Меҳмонхона ичида ҳужумларни давом эттирмоқдамиз», — дейилади террорчиларнинг хабарида.
Отишма қурбонлари кўп бўлиши мумкин, чунки соқчилар ва жангарилар ўртасидаги отишма давом этмоқда.