Бошқа мавзуларЎзАнинг Тошкент шаҳар ИИБ йўл ҳаракати хавфсизлиги бошқармаси матбуот хизматига таяниб маълум қилишича, жорий йилнинг олти ойида амалга оширилган чора-тадбирлар натижасида пойтахтимизда оғир оқибатли йўл-транспорт ҳодисалари ўтган йилнинг шу даврига нисбатан 40 фоизга, ҳодисалар оқибатида вафот этганлар 35,5 фоизга, тан жароҳати олганлар 27,5 фоизга камайди.
Олти ойда расмийлаштирилган 470,5 минг баённома асосида 36,3 миллиард сўм жарима белгиланиб, унинг 25,6 миллиард сўми ёки 70,5 фоизи ундирилиб, давлат ғазнасига йўналтирилди.
Пиёдалар ўртасида йўлнинг белгиланмаган қисмидан кесиб ўтиш ҳолатлари кўпайиб бормоқда. Бу ҳолатларга барҳам бериш мақсадида ҳозиргача 43,5 мингта қоидабузар пиёда аниқланиб, уларга ўрнатилган тартибда қонунчилик талабларидан келиб чиққан ҳолда чора кўрилди.
Кўча ва йўлларда, йирик савдо мажмуалари атрофида сунъий тирбандликларнинг олдини олиш мақсадида, тўхташ ва тўхтаб туриш қоидаларини бузган 20,5 минг ҳайдовчига ўрнатилган тартибда чоралар кўрилди.
Тизимдаги яхши янгиликларда яна бири – “Биллинг” тизимида тўловлар амалга оширилиб, пойтахтнинг 7 та туманида ҳайдовчилик гувоҳномасини Давлат хизматлари маркази орқали бериш йўлга қўйилди.
Ҳар бир рўйхатдан ўтказиш ва имтиҳон олиш бўлимларида бепул “Wi-Fi” зоналар ташкил этилди, фуқароларни қабул қилиш дарчалари сони кўпайтирилди. Бунда ногиронлар ва аёллар учун алоҳида навбатсиз дарчалари ташкил этилди.
