Телеграмдаги Zed News каналининг ёзишича, Гулнора Каримованинг қизи Имон Каримова Instagram саҳифасида Зангиота аёллар қамоқхонасида жазосини ўтаётган онаси устидан 2 август куни “яна бир нолегал суд режалаштирилаётгани” ҳақида ёзган.
Имон Каримованинг таъкидлашича, бу суд онасига нисбатан “халқаро меъёрлар ва қонунларга хилоф равишда уни жисмонан йўқ қилиш учун босим қўллашда давом этишларини яна бир бир исботлайди”.
Имон Каримова, шунингдек, швейцариялик адвокат онаси билан бир неча бор учрашолмаганини эслатган.
Июль ойи бошида Имон Каримова онасининг қамоқхонадаги аҳволининг кун сайин оғирлашаëтганини ёзганди. Аммо кейинроқ бу гаплари тасдиқланмаганини айтган. Бундан ташқари, онасига оид постларни “бошқа шахслар” ёзишини таъкидлаган.
Лекин у “бошқа шахслар” кимлиги ҳозирча ҳеч кимга аён эмас.
Адлия вазирлиги Гулнора Каримова сақланаётган Зангиотадаги 21-аёллар қамоқхонасида текширув ўтказган ва Каримованинг саломатлигига оид иддаолар тасдиқланмаган эди.