АҚШ давлат департаменти фискаль шаффофликка бағишланган йиллик ҳисоботини эълон қилди. Унда Ўзбекистон шаффофлик учун минимал талабларни бажармаётган 67 та давлатлар рўйхатидан жой олди.
Ўзбекистон мазкур рўйхатда Озарбайжон, Туркманистон, Ироқ, Покистон, Саудия Арабистони сингари давлатлар қаторидан жой олди. Грузия, Арманистон, Молдова, Туркия, Польша, Словакия, Афғонистон ва Қирғизистон ва бошқалар мазкур талабларга жавоб бераётган давлат сирасига киради.
Ҳисоботда айтилишича, ҳукуматларнинг йиллик молиявий шаффофлиги ҳисоботи АҚШ солиқчилари маблағидан ажратиладиган ёрдам маблағларининг белгиланган тартибда тўғри ишлатилишини кўзлайди.
Ўзбекистондаги ижобий ўзгаришлар қаторида фуқаролар учун бюджет алоҳида қайд этилиб, унинг онлайн жойлаштирилиши эътироф қилинган.
Шундай бўлса, муаммолар ҳам анчагина. Жумладан:
· давлат компанияларининг қарз мажбуриятлари таркиби очиқланмайди;
· вазирликлар ва бошқа давлат ҳокимияти органларининг харажатлари ҳақида ахборот йўқ;
· табиий ресурслардан тушаётган даромадлар ҳақида батафсил ахборот йўқ;
· фойдали қазилмаларни қазиб олиш бўйича контрактлар ҳукумат томонидан қандай тамойиллар асосида тузилиши тушунарсиз.
АҚШ давлат департаменти фикрича, юқоридаги бўшлиқлар бартараф этилса, Ўзбекистонда молиявий шаффофликни таъминлаш имконияти кенгаяди.
Манба:davletovuz