Бошқа мавзулар
Бирлашган Миллатлар Ташкилоти Қозоғистондаги вазиятни хавотир билан кузатмоқда. Бу ҳақда ташкилот матбуот котиби Стефан Дужарик Нью-Йоркдаги брифингда маълум қилди.
“Албатта, биз Қозоғистондаги воқеалар ривожини хавотир билан кузатмоқдамиз. Менимча, барча иштирокчилар сабр билан, зўравонликларга йўл қўймай музокара олиб бориши муҳим”, – дейди Дужарик.
Бундан аввалроқ Қўшма Штатлар Қозоғистон ҳукуматини вазминликка чақириб, намойишга чиққанларни ўз талабларини тинч йўл билан билдиришга чақирган эди.
6-январга ўтар кечаси Хавфсизлик кенгаши йиғилишида президент Қосим-Жўмарт Тўқаев “мамлакатни пароканда қилган террорчи гуруҳлар хорижда кенг қамровли тайёргарликдан ўтгани ва Қозоғистонга қилинган ҳужумни босқинчилик ҳаракати сифатида баҳолаш кераклигини” айтди.
Қозоғистон раҳбари КХШТ етакчиларидан ҳам ёрдам сўради.
Кўп ўтмай, Коллектив Хавфсизлик Шартномаси Ташкилотига раислик қилаётган Арманистон бош вазири Никол Пашинян “Фейсбук”саҳифаси да ташкилот тинчликпарвар кучлари Қозоғистонга чекланган муддатга юборилишини маълум қилди.
