Туркманистонда имтиёзли озиқ-овқат етказиб бериш аста-секин йўқ бўлиб кетмоқда ва товарлар нархи ошиб бормоқда. Норози бўлганлар жиноий жавобгарликка тортилмоқда.
Янги йилдан сўнг арзонлаштирилган озиқ-овқатлар ўз вақтида етказилмаганига норозилик билдирган одамлар дарҳол милиция бўлимига олиб кетилмоқда. Улар жиноий жавобгарликка тортилиши ҳақида огоҳлантирилди.
Бир ой олдин бир гуруҳ фаоллар Савдо вазирлигига ариза билан мурожаат қилган эди.
Шикоятчилар пенсионерларга имтиёзли озиқ-овқат берилмагани, сотувчилар тарозида алдаб, дўконларда тўлов карталарини қабул қилмаётганини айтишди.
Йил бошида ҳукумат пенсияларни 10 фоизга оширишни эълон қилган эди. Расмий маълумотларга кўра, январь ойидан бери энг кам пенсия миқдори 410 манатни ташкил қилган. Марказий банк курси бўйича 410 манат 117 доллар бўлади.