Бошқа мавзуларПокистон ҳарбийлари Белужистон вилоятида айирмачиларнинг ҳужуми оқибатида ўн нафар аскарини йўқотганини маълум қилди.
Расмийларнинг айтишича, жангарилар Кеч туманидаги назорат-ўтказиш пунктига ҳужум қилган. У ердаги отишмада аскарлар ҳалок бўлган. Ҳужум қилганлардан бири ўлдирилган. Хабарда айтилишича, ҳужум 26-январга ўтар кечаси содир бўлган. Исёнчилардан уч нафари қўлга олинган, қолганларини қидириш ишлари давом этмоқда.
Айирмачи ҳисобланган “Балужистон озодлик фронти” ҳужум учун масъулиятни ўз зиммасига олди. Ҳаракат матбуот хизмати улардан бири ўлдирилганини тасдиқлаб, “17 нафар полициячини ўлдирганини” маълум қилди.
Покистон расмийларига кўра, 20-январь куни мамлакатнинг иккинчи йирик шаҳри Лаҳор шаҳридаги бозорда содир этилган портлашда икки киши ҳалок бўлган, камида 20 киши жароҳатланган. Ҳужум учун масъулиятни “Балуж миллий армияси” (БМА) ўз зиммасига олган.
Балужистон вилоятида айирмачилар бир неча гуруҳ тузишган. Афғонистон ва Эрон билан чегарадош минтақадаги балуж исёнчилари узоқ вақтдан бери Покистондан мустақил бўлишга ҳаракат қилиб келади. Минтақада портлашлар ва диний тўқнашувлар тез-тез бўлиб туради. 2004 йилдаги тўқнашувлар минглаб одамларнинг ўлимига сабаб бўлган.
