Украиналик олигархлар билан тадбиркорлар Киевдан чартер рейслари орқали мамлакатдан чиқиб кетишмоқда. Биргина якшанба куни пойтахтдан 20 га яқин чартер рейслар ва шахсий самолётлар парвоз қилди. Бу ҳақда «Украинская правда» портали хабар берди.
Порталнинг ёзишича, шундай ваҳима сўнгги олти йил ичида биринчи марта кузатилмоқда.
Украинадан учиб кетган чартерлар ва бизнес самолётлар орасида Ринат Ахметов ва Борис Колесниковнинг ҳам бортлари бор. Бироқ Колесников Киевни тарк этмаганини айтди. Унинг айтишича, шахсий самолёти Прагага техник таъмирланиш учун учган.
Шунингдек Ахметов Украинадан Цюрихга 30 январь куни учган.
Шу куни тадбиркор Виктор Пинчук ҳам мамлакатни тарк этган.
Миллионер Игор Абрамович ҳам 50 йўловчига мўлжалланган бизнес бортини чақиртирган экан. “Украинская правда”нинг ёзишича, депутат Венага ўз партиядошларининг қариндошлари ва бизнес ҳамкасбларини олиб чиқиб кетмоқчи бўлган. Бироқ Абрамовичнинг ўзи бу маълумотни ҳали тасдиқлагани йўқ.