Бошқа мавзуларУкраина президенти Владимир Зеленский халқига қилган мурожаатида Украинанинг халқаро миқёсда тан олинган чегаралари ўзгаришсиз қолишини айтди.
“Бизда ва мамлакатимизда тарих бўйича узоқ-узоқ маърузалар тинглашга вақтимиз йўқ, шунинг учун мен орқага қарамайман, ҳозирги вазият ва келажак ҳақида гапирайин. Менинг орқамда халқаро миқёсда тан олинган чегаралари билан Украина турибди, бунга боғлиқ Россия Федерацияси бу ҳақда нима деса ҳам ёки нима қилса ҳам, у ўзгармасдан қолади”, деди Зеленский ўз баёнотида.
Шунингдек, Украина раҳбари Донецк Халқ Республикаси ва Луганск Халқ Республикасининг тан олиниши Россиянинг Минск келишувидан ўзбошимчалик билан чиққанини англатишини айтди.
Эслатиб ўтамиз, аввалроқ Россия президенти Владимир Путин Донецк Халқ Республикаси ва Луганск Халқ Республикаси суверенитетини тан олиш ҳақидаги фармонни имзолаб, Россия армиясига у ерда тинчликни таъминлашни топширди.
