Россия БМТ Хавфсизлик кенгашининг Москванинг Украинага ҳужумини қораловчи резолюция лойиҳасига вето қўйди.
АҚШ ва Албания ҳаммуаллифлари бўлган резолюцияни кенгашнинг 11 аъзоси қўллаб-қувватлади. Хитой, Ҳиндистон ва Бирлашган Араб Амирликлари бетараф қолди.
Ушбу резолюциянинг лойиҳасида Россия Украинага қарши “тажовузкорлигини” кўрсатгани, Москва қўшинларини Украинадан зудлик билан олиб чиқиб кетиш талаб қилингани ёзилади.
Россиянинг Украинага бостириб кириши 24 февралнинг тонгидан бери давом этмоқда. Бир қатор шаҳарларда, жумладан, пойтахт Киевда қуролли тўқнашувлар бўлиб ўтмоқда. Украина расмийларига кўра, жангларнинг биринчи кунида 137 аскар ҳалок бўлган.
Россия қурбонлар ҳақида маълумот бермади. Киев 25-февраль куни соат 15:00 га қадар 3000 га яқин рус аскарини ўлдирганини айтди. Москва буни тасдиқламади.