Бошқа мавзуларРоссия қуролли кучлари Киевнинг Русановка, Вишнево, Куреневка, Боярка ва Жуля ҳудудларига ҳаво ҳужумлари уюштирмоқда. Бу ҳақда Украина Махсус алоқа ва ахборотни ҳимоя қилиш давлат хизмати ярим тунда телеграм орқали хабар берди.
Хабарларга кўра, Киев вилоятининг Белая Церков шаҳрида ҳам кучли портлаш овози эшитилган. Россия қуролли кучлари шимоли-шарқдаги Харьков шаҳрида, мамлакат жанубидаги Херсон шаҳри ва ғарбий Житомир шаҳарларига ҳам ҳужум уюштираётгани хабар қилинмоқда.
1 март куни тушдан кейин Россия армияси Киевдаги телеминорага зарба берди. Хабар қилинишича, камида беш тинч аҳоли ҳалок бўлган.
28 февраль ва 1 март кунлари Россия ҳаво кучлари Украинанинг Харьков шаҳрини бомбардимон қилди. Интернетда жойлаштирилган видеода шаҳар ҳокимияти яқинида ракета зарбасидан портлагани акс этган.
Россия армияси 24 февраль куни Украинага бостириб кирди. Ўшандан бери ўнлаб тинч аҳоли ва юзлаб аскарлар ҳалок бўлди. Россия расмийлари тинч аҳоли ҳудудига зарбалар бераётганини инкор этиб келмоқда.
