Украина президенти Владимир Зеленскийнинг иқтисодий маслаҳатчиси Олег Устенко Россиянинг 15 кунлик ҳужуми инфратузилма, бинолар ва бошқа мулкларга 100 миллиард доллар зарар етказганини айтди.
Пайшанба куни бўлиб ўтган халқаро онлайн конференсияда сўзлаган Устенко мамлакатдаги корхоналарнинг ярми уруш сабаб ёпилганини, қолганлари эса тўлиқ ишламаётганини айтиб, Россияга қарши молиявий санкцияларни кучайтириш, нефть ва газга тўлиқ эмбарго жорий этишга чақирди.
Россия армияси 24-февралда бошлаган урушда Украина армиясининг шиддатли ҳимоясига дучор бўлганда, Москва ўз тактикасини ўзгартириб, шаҳарлар, жумладан, аҳоли пунктларини ҳаво ҳужумлари ва артиллериядан ўққа тута бошлади.
Олег Устенконинг айтишича, жанглар кўламини ҳисобга олганда, Украинанинг молиявий тизими нисбатан “яхши” ва банкоматлар Россия ҳарбийлари назорати остида бўлмаган ҳудудларда ишламоқда.
Унинг сўзларига кўра, миллий валюта захиралари бор-йўғи 2,5 миллиард долларга камайган, бироқ мамлакат катта иқтисодий ва ҳарбий ёрдамга муҳтож.