Львов шаҳрининг марказида 109 та болалар аравачаси қўйилди. Аравачалар Россия Украинага бостириб кирганидан сўнг ҳалок бўлган болаларни хотирлаш учун қўйилган.
“Урушнинг баҳоси” деб номланган акциянинг мақсади бегуноҳ болалар ҳалок бўлаётганига дунё эътиборини қаратишдир. Тадбир Львов шаҳар кенгаши томонидан ташкил этилди. Маълумотларга кўра, уруш бошланганидан бери 109 нафар бола ҳалок бўлган.
18-март куни Львовдаги самолёт заводига тўртта ракета отилиб, бир киши жароҳатланган эди. Ракета Қора денгиздан отилган. Икки ракетани эса Украина ҳаво ҳужумидан мудофаа қилиш кучлари отиб туширган.
Львов шаҳри Киевдан ва уруш бўлаётган бошқа вайронага айланган шаҳарлардан келган қочқинлар билан тўлиб кетган, уларнинг бир қисми Польша, Германия ва бошқа Европа давлатларига қочмоқда.
Россия президенти Владимир Путиннинг “Донбасс аҳолисини ҳимоя қилиш” ҳақидаги баёноти ортидан 24 февраль куни Россия қўшинлари Украинага бостириб кирди. Ўшандан бери Украинанинг барча ҳудудларида отишмалар ва портлашлар давом этмоқда. Энг йирик ҳужумлар Киев, Харьков, Мариупол ва Львовда амалга оширилди. Юзлаб одамлар ҳалок бўлди, 3 миллиондан ортиқ киши уй-жойини ташлаб кетишга мажбур бўлди.