Бошқа мавзулар24-март куни Бельгия пойтахти Брюсселда Украинадаги вазиятга бағишланган навбатдан ташқари саммитда НАТО етакчилари Шимолий Атлантика Шартномаси Ташкилотида хавфсизликни кучайтиришга келишиб олдилар. Улар блокнинг Европада қўшинларини тўрт баробар кўпайтиришга ва янги кучларни Руминия, Венгрия, Словакия ва Болгарияга жойлаштиришга қарор қилдилар.
Саммитдан кейин уюштирилган матбуот анжуманида ташкилот бош котиби Йенс Столтенберг НАТО Украинани қўллаб-қувватлаш ва қурол-яроғ ва техника жўнатишда давом этишга келишиб олинганини айтди. НАТО можаро авж олишига йўл қўймаслик учун Украинага қўшинларини киритмаслик мажбуриятини сақлаб қолишини маълум қилди.
Украина президенти Владимир Зеленский саммитда видеомурожаат қилиб, Шимолий Атлантика Шартномаси Ташкилотини Россия агрессиясига қарши курашаётган Киевни қўллаб-қувватлашни кучайтиришга чақирди. У ташкилот танклари ва самолётларининг камида 1 фоизини Киевга беришини сўраниб, Украина ҳаво ҳудудида парвоз қилишни тақиқлашни сўраган.
Столтенберг ҳарбий ёрдам тафсилотлари ошкор этилмаслигини, бироқ гуруҳ етакчилари “Украина узра учиш тақиқланган ҳудуд яратишга рухсат беришдан бош тортганини” айтди. Саммитда Столтенбергнинг ваколатини 2023 йилнинг кузигача узайтириш ҳақида ҳам қарор қабул қилинди.
Сўнгги саммитда АҚШ президенти Жо Байден, Туркия президенти Ражаб Тоййиб Эрдўғон, Франция президенти Эммануел Макрон, Буюк Британия бош вазири Борис Жонсон, Германия канцлери Олаф Шольс ва бошқа етакчилар иштирок этди.
