Бошқа мавзуларМосквада муҳожирлар ўртасидаги муштлашувга алоқадорликда гумон қилиниб, 41 нафар тожикистонлик ва 85 нафар ўзбекистонлик қўлга олинди. 6-апрель куни Ўзбекистоннинг Ташқи миграция агентлиги улардан 20 нафари депортация қилинишини маълум қилди.
Дастлабки маълумотларга кўра, 1-апрель куни компаниянинг икки ходими ўртасида жанжал келиб чиққан, бунда бошқалар ҳам иштирок этиб қолган.
Аввалроқ ижтимоий тармоқларда Москвадаги “Сердце Столицы” деб номланган кўп қаватли уй майдонида муҳожирлар ўртасида муштлашув юз бергани, полиция 125 кишини ҳибсга олгани ҳақида хабар берилган.
Россияда муҳожирлар ўртасида оммавий муштлашувлар аввал ҳам кўп кузатилган. Март ойи бошида Россиянинг Узоқ Шарқидаги Благовешенск шаҳрида меҳнат муҳожирлари муштлашаётгани акс этган видео пайдо бўлган эди. Можаро иштирокчилари Тожикистон ва Қирғизистондан келган муҳожирлар экани аниқланган.
2021-йилнинг июль ойида Москвадаги “Кузьминки” метро бекати яқинида Қирғизистон фуқаролари Тожикистон фуқаролари билан тўқнашган. Тўқнашувларда 200 га яқин одам иштирок этгани, кейинроқ 100 га яқини ушлангани, 40 га яқини ҳибсга олингани хабар қилинган.
Россиядаги муҳожирларни текшириш ва депортация қилиш Қирғизистон ва Тожикистон фуқаролари ўртасидаги муштлашув ортидан авж олди. Қўшни Қирғизистоннинг парламентида қирғизистонликларга ёрдам кўрсатиш масаласи кўтарилган.
