Россия мактабларида тарихни ўқитиш биринчи синфдан бошланади. Бу ҳақда таълим вазири Сергей Кравцов маълум қилди.
“Тарихий қадриятларни сақлаб қолиш учун барча имкониятларни ишга соламиз. Шунинг учун мактабларга биринчи синфдан бошлаб тарих фанини ўргатишга қарор қилдик”, деди у.
Вазирнинг қўшимча қилишича, бу тарих фанини биринчи синфларга киритиш дегани эмас, балки бошланғич синф ўқувчилари табиатшнослик дарслари доирасида ўз ҳудуди, туғилган жойини муҳокама қилишлари, музей ва кўргазмаларга ташриф буюришлари мумкин.
Дарвоқе, ҳозирда Россия мактабларида тарих фани 5-синфдан бошлаб ўқитилади.
Россия президентининг матбуот котиби Дмитрий Песков вазирнинг ташаббусини олқишлаб, етти ёшли боланинг қизиқишлари юқори бўлишини айтди. Шу билан бирга, у якуний қарорни олий ҳокимият органлари қабул қилиши кераклигини айтган.