Туркманистоннинг Болқон вилоятида янги президент Сердар Бердимуҳамедовни улуғловчи қўшиқлар танлови эълон қилинди. Ғолибларга «катта совринлар» ваъда қилинмоқда.
Маҳаллий аҳолининг сўзларига кўра, вилоят ҳукумати Туркманистон бўйлаб хит бўладиган қўшиқлар ёзилади дея ният қилмоқда.
Расмийлар таъкидлаганидек, яқинда президент Болқон вилоятига ташриф буюрганида, уни мадҳ этувчи қўшиқлар кўп айтилмагани учун, маҳаллий ҳокимият вакилларига гап теккан.
Сердар Бердимуҳамедов 15-апрель куни вилоятга ташриф буюриб, шифохонанинг очилишида иштирок этди. Унинг ташрифига тайёргарлик бир ой олдин бошланган ва тадбирда иштирок этадиган маданият ходимлари карантинга олинган.
12-мартда муддатидан олдин бўлиб ўтган президентлик сайловларидан сўнг у ҳокимиятни отаси Гурбангули Бердимуҳамедовдан ўз қўлига олган.
Сердар Бердимуҳамедов ҳокимиятга келиши биланоқ унинг шахсиятига сиғиниш бошланди. Унинг суратлари давлат идоралари ва кўчаларга осиб қўйилган. Ҳатто таксичилардан машиналарига президентнинг суратини ёпиштириш талаб қилинган.