Бошқа мавзуларБритания келаси ҳафта Украина пойтахти Киевдаги элчихонасини қайта очади. Бу ҳақда Буюк Британия бош вазири Борис Жонсон 22-апрелда Ҳиндистонга ташрифи чоғида айтиб ўтди. Бироқ у элчихона қачон очилишига аниқлик киритмади.
Россиянинг Украинага бостириб кириши олдидан Британия Киевдаги элчихонасини Украина ғарбидаги Львов шаҳрига кўчирган эди.
Британия ташқи ишлар вазири Лиз Трасс алоҳида баёнот тарқатиб, Украинанинг Россия кучларига қарши “алоҳида муваффақияти” туфайли Лондон Киевдаги элчихонасини қайта очаётганини таъкидлади.
Апрель ойининг бошида Буюк Британия бош вазири Жонсон Киевга бориб, Украина президенти Владимир Зеленский билан музокараларни ўтказган . У Украина пойтахтининг айрим кўчаларини ҳам кўздан кечирган эди.
Россия 24-февралда Украинага бостириб кирган эди. Ўшандан бери Украинада минглаб тинч аҳоли ва аскарлар ҳалок бўлди. Бирлашган Миллатлар Ташкилотига кўра, уруш бошланганидан бери беш миллиондан ортиқ украиналик мамлакатни тарк этган.
