Бошқа мавзуларУкраинанинг пойтахти Киев ва бир қатор ҳудудларда, православларнинг Пасха байрами нишонланмоқда. Бир кун аввал президент Владимир Зеленский Киевдаги София соборидан видеомурожаат йўллаб, Украина урушда ғалаба қозонишига ишонишини билдирди. У Мариуполдаги сўнгги Украина қўшинларини “қаҳрамон ҳимоячилар” деб атади.
“Бизнинг деворларимизни бузиб ташлаш мумкин. Аммо бизнинг аскарларимизнинг ва бутун мамлакат руҳинининг пойдеворини бузиб бўлмайди”, — деди Зеленский.
Православларнинг Пасха байрами Россия Украинага бостириб кирганига роппа роса икки ой бўлган вақтга тўғри келди. Аввалроқ Украина ҳукумати диний маросимларнинг аксарияти шу куни онлайн тарзда ўтказилиши ҳақида огоҳлантирган ва аҳолини тунги комендантлик соатига риоя қилишга чақирган эди.
Дунёдаги православларнинг руҳоний раҳбари Патриарх Вартоломей Пасҳа муносабати билан йўллаган мактубида Украинанинг Мариупол бош бўлган бир қатор шаҳарларига гуманитар йўлак очишга чақирди.
Аммо бир неча кун олдин Украина президенти Зеленский Россия томони Киевнинг Пасха байрамида ўт очишни тўхтатиш ҳақидаги таклифини рад этганини айтган.
Россия билан музокаралар олиб бораётган Украина делегациясига бошчилик қилган Михаил Подолякнинг якшанба куни маълум қилишича, Россия кучлари Украина кучларининг сўнгги таянчи бўлган Мариуполдаги Азовстал заводини ўққа тутишда давом этмоқда.
Украинада 24-февралдан бери давом этаётган урушда минглаб тинч аҳоли ва аскарлар ҳалок бўлди, 5 миллиондан ортиқ украиналиклар мамлакатни тарк этишга мажбур бўлди.
