Бошқа мавзуларТуркия Сурияга учаётган Россиянинг ҳарбий ва фуқаровий самолётлари учун ҳаво ҳудудини ёпди. Бу ҳақда Туркия ташқи ишлар вазири Мевлут Чавушўғли 23-апрелда маълум қилди.
Россиянинг Сурияда ҳарбий контингенти, жумладан, жанговар самолётлари бор.
Чавушўғлининг сўзларига кўра, учишга уч ой рухсат берилган ва апрелда муддати тугаган, бироқ Туркия уни узайтирмаган. Ушбу қадамга нима сабаб борганини айтмади. Унинг қўшимча қилишича, ҳарбий кемаларнинг ҳам Босфор бўғозидан ўтиши тақиқланди. Туркия бу қадамга Украинадаги уруш туфайли борган.
Россиядан Сурияга энг қисқа йўл Туркия ҳаво ҳудуди орқали ўтади. Унинг ёпилиши Эрон ва Ироқ устидаги ҳаво ҳудудидан фойдаланишга тўғри келишини англатади.
Чавушўғли Туркиянинг Россия ва Украина ўртасидаги можарода воситачилик қилишда давом этаётганини айтди. Унга кўра, ишчи гуруҳларда музокаралар олиб борилмоқда. Унинг қўшимча қилишича, Украина ва Россия президентлари Туркияда учрашишга олдиндан келишиб олган.
