Бошқа мавзуларРоссиянинг Мудофаа вазирлиги Украинанинг Мариупол шаҳридаги «Азовсталь» заводи яқинида қамалда қолган аҳолини эвакуация қилиш учун гуманитар йўлак очганини маълум қилди. Бу ҳақдаги маълумот вазирлик сайтида эълон қилинган.
Унда айтилишича, коридор Москва вақти билан соат 14:00 (Тошкент вақти билан 16:00) да ишлай бошлайди, шу вақтдан бошлаб Россия аскарлари ўт очишни бир томонлама тўхтатади.
Азов денгизи соҳилидаги шаҳарнинг деярли барча ҳудуди рус қўшинлари томонидан ишғол қилинган. Ушбу завод ҳудудида қолган украин аскарлари қаршилик кўрсатишда давом этиб, бутунлай қамалда қолди. Россия аскарлари заводга тез-тез ҳужумлар уюштириб турибди.
Украинанинг расмий ҳукумати завод олдидаги лабиринтли туннелларда мингдан ортиқ тинч аҳоли бошпана топганини айтиб келади. Киев уларни эвакуация қилиш учун Россияга бир неча бор хавфсиз йўл таклиф қилган. Ушбу ҳаракатлардан ҳозирча натижа чиқмади.
Россия президенти Владимир Путин 21-апрелда мудофаа вазири Сергей Шойгуга Мариуполдаги “Азовсталь” заводига ҳужумни тўхтатиш ва рус қўшинлари ҳаётини сақлаб қолиш учун қамал қилишни буюрди. Мудофаа вазирлигининг билдиришича, заводдаги украина аскарларининг ўққа тутилиши тўхтатилганини эълон қилгани билан ҳужумлар давом этмоқда.
