Бошқа мавзулар«Газпром» 27-апрелда Польша ва Болгарияга газ етказиб беришни тўхтатди. Бу ҳақда ушбу мамлакатлар энергетика вазирликлари маълум қилди.
Компаниянинг бундай қарорга келишига икки давлатнинг газ учун тўловни рублда тўлашдан бош тортгани сабаб бўлган.
Аввалроқ Польшанинг Onet портали ҳукумат ва PGNiG энергетика компаниясидаги манбаларга таяниб, Польшага газ етказиб бериш билан боғлиқ муаммолар ҳақида ёзган эди. Маълумотда ёзилишича, дастлаб кўк олов босими пасайган, кейин эса бутунлай тўхтаган.
Аввалроқ “Газпром” Польша ва Болгария газ учун пулни 26-апрелда янги схема бўйича тўлаши кераклиги ҳақида огоҳлантирган.
Польша ҳукуматининг стратегик энергетика инфратузилмаси бўйича вакили Петр Наимски 26 апрелда Варшава газ учун рублда тўламаслигини билдирган.
Onet Польша ҳукумати вазиятни ҳал қилиш учун махсус инқироз гуруҳини тўплаганини маълум қилди.
Болгариянинг Иқтисодиёт вазирлиги Россиянинг газни бермай туриб, шартномага қарама-қарши келган тўлов юритишни талаб қилганига рози эмаслигини маълум қилди.
Россиянинг Украинага уруш очгани сабабли Ғарб Москвага нисбатан мисли кўрилмаган иқтисодий санкциялар киритди. Март ойи охирида Россия президенти Владимир Путин газни “душман давлатлар”га фақат рублда сотиш ҳақидаги фармонни имзолаган эди. Ғарб давлатлари бунинг учун “Газпромбанк”да ҳисоб очишга мажбур бўлиши керак эди.
Кремл қароридан сўнг Болтиқбўйи давлатлари Латвия, Литва ва Эстония Россиядан газ сотиб олишдан бош тортди.
Россия Европанинг 40 фоиз газ билан таъминлайди. Улардан Германия Россия табиий газига кўпроқ қарам. У газнинг 50 фоизини Москвадан олади.
