Бошқа мавзуларРоссия президенти Владимир Путин Украинадаги вазиятга “ташқаридан кимдир” аралашиб, Россияга стратегик хавф туғдирса, Москва “чақмоқ” каби зарба бериши ҳақида огоҳлантирди. Бу ҳақда у Санкт-Петербургда Қонунчилик кенгаши аъзоларига мурожаат қилаётиб маълум қилди. Путин зарбаларни “ответно-встречный” деб атади. Бу атама ҳарбий доктринада ядро қуроли билан боғлиқ ҳолда қўлланилади.
Россия президенти қайси нишонга қандай қуроллардан зарба берилишига аниқлик киритмади. У ўз сўзида Россиянинг рақибларида йўқ қуроллари ҳақида гапириб, 24-февралдаги огоҳлантиришини эслатди. Украинага қилинган ҳужумни изоҳлар экан, Путин “чет эл аралашса” унинг оқибатлари тарихда бўлиб кўрмагандай бўлишини айтди.
Владимир Путин “Украина ва Донбассдаги махсус ҳарбий операция” давом этишини, барча мажбуриятларни сўнггига етказишини айтди. Шу жумладан, Россиянинг, аннекция қилинган Қрим ҳамда ДНР билан ЛНР аҳолисининг хавфсизлигини тилга олди.
Россиянинг ўзи “махсус операция” деб атаган, аслида Украина учун бўлаётган уруш икки ойдан ортиқ вақтдан бери давом этмоқда. Москва кенг кўламли ҳужумини 24-февралда бошланган. Айни пайтда рус қўшинлари Украина жануби ва шарқий қисмининг катта қисмини эгаллаб олган. Киев, Чернигов ва бошқа шимолий ҳудудлардан эса ортга чекинишди.
Жанглардан ҳар икки томондан аскарлар ва тинч аҳоли орасида минглаб қурбонлар борлиги хабар қилинган. Ғарб давлатлари Украинага қурол етказиб беришни кучайтириб, Россияга қарши санкциялар жорий қилмоқда. Шундай бўлса ҳам ўзлари Россия билан тўғридан-тўғри қарама-қаршиликка бормасликларини айтишмоқда.
