Бошқа мавзуларУкраина суди икки нафар россиялик асирнинг ҳар бирини 11 ярим йиллик қамоқ жазосига ҳукм қилди. Улар Рус босқинининг биринчи куни, 24-февралда Харьков вилоятидаги тинч аҳоли объектни нишонга олганлиги учун айбдор деб топилди. Прокурорлар уруш қоидалари ва анъаналарига риоя қилмаслик моддаси бўйича айбдор деб топилган Александр Бобикин ва Александр Ивановни 12 йилга озодликдан маҳрум қилишни талаб қилди. Иккаласи ҳам ўз айбига иқрор бўлди.
Тергов маълумотларига кўра, 24-февраль куни улар Украина қишлоқларини Россиянинг Белгород вилоятидан ва Украина ҳудудидан “Град” тизими билан ўққа тутишда иштирок этган. Прокуратура натижада уйлар ва лицей вайрон бўлган деб ҳисоблайди.
Адвокат аскарлар қўмондонлик буйруғига бўйсунганини айтиб, жазони қисқартиришни сўради. Прокуратуранинг билдиришича, буйруқ берган командирлар шахси аниқланмоқда. Ивановнинг сўзларига кўра, баъзи аскарлар ўз командирларига бўйсунмаган.
23-май куни 21 ёшли россиялик сержант Вадим Шишимарин Суми вилоятида маҳаллий аҳолини отиб ўлдирганликда айбланиб, умрбод қамоқ жазосига ҳукм қилинган эди. У ҳам айбини тан олган.
