Бошқа мавзуларСеверодонецк шаҳри учун бўлаётган жанг Донбасснинг тақдири учун ҳал қилувчи рол ўйнайди. Бу ҳақда Украина президенти Владимир Зеленский чоршанба оқшомидаги мурожаатида атди. Мамлакат шарқидаги стратегик шаҳар бир неча кундан бери шиддатли жангларнинг ўчоғи бўлиб келмоқда. У ердаги вазият тез-тез ўзгармоқда.
Луганск вилояти губернатори Сергей Гайдай Россия кучлари «Северодонецкнинг катта қисмини ўз назоратига олганини», бироқ саноат зоналари Украина қўлида эканлигини ва шаҳар кўчаларида жанглар давом этаётганини телеграм каналига ёзди.
Россия армияси Украинанинг бошқа ҳудудларидан сиқиб чиқарилгач, Донбассга қўшин ва техника йиға бошлаган эди.
Луганск губернатори Лисичанск шаҳри ўққа тутилганини ёзиб, атайлаб касалхоналар ва гуманитар ёрдам марказларини нишонга олганликда рус аскарларини айблади.
Уруш шароитида бу маълумотларни аниқлаш мумкин эмас.
Британия Мудофаа вазирлиги 9-июндаги бюллетенида Россия қўшинлари Изюм шаҳри томон олдинга силжишга уринаётганини билдирди.
