Бошқа мавзулар
Қозоғистон президенти Нурсултон Назарбоевнинг невараси Нурали Алиев Остона шаҳри ҳокимининг ўринбосари этиб тайинланди. Бу ҳақда пойтахт ҳокими Адилбек Жақсибеков 19 декабрь куни фармойиш чиқарди.
29 ёшли Алиев Қозоқ миллий педагогика университетини тугатган, шунингдек, АҚШ ва Австрияда таҳсил олган.
У “Сахарный Центр” АЖ ва “Hit TV” телеканали президенти бўлган, “Нурбанк” директорлар кенгаши раиси ва “Қозоғистон тараққиёт банки” бошқарувчи директори бўлиб ишлаган. Ўтган йилнинг декабрида “Қозоғистон темир йўли” компаниясига қарашли “Транстелеком” акциядорлик жамиятининг президенти (бошқарув раиси) этиб тайинланди.
2012 йилда “Форбс” журнали тузган Қозоғистоннинг энг бой кишилари рўйхатида 200 миллион доллари билан 25-ўринни эгаллаган эди.
Нурали Алиев Қозоғистон президентининг тўнғич қизи Дариға Назарбоева ва Роҳат Алиевнинг ўғлидир. Маълумки, Роҳат Алиев Қозоғистон раҳбарининг қаҳрига учраган, одам ўғирлаш ва бошқа жиноятларда айбланиб, сиртдан 20 йилга озодликдан маҳрум этилган.
