Қирғизистондаги “Лола инқилоби”га 10 йил тўлди

Қирғизистонда президент Аскар Акаевнинг истеъфоси билан якунланган “Лола инқилоби”га 10 йил тўлди.

2005 йилнинг бошларида ўтказилган парламент сайлови натижаларидан норози мухолифат Қирғизистон бўйлаб намойишларни бошлаган ва 24 март куни Бишкекнинг “Ала-Тоо” майдонига ҳукумат истеъфосини талаб қилиб 30 минг чоғли одам тўпланган эди.

Алал-оқибат президент Аскар Акаев Россияга қочиб кетди, унинг ўрнини эса мухолифат етакчиси Қурбанбек Бакиев эгаллади. Аммо беш йил кейин – 2010 йилнинг апрелида Бакиев ҳам ҳокимиятдан ағдарилди ва у ҳам Акаев сингари мамлакатни тарк этди.

Биринчи инқилоб деярли қон тўкилишларисиз ўтган бўлса, иккинчисида 87 киши ўлдирилди, 300дан ортиқ киши жароҳат олди.

Бугун Бишкекдаги “Ала-Арча” қароргоҳида “2005 ва 2010 йиллардаги халқ инқилоблари: сабаблари ва сабоқлар” номли илмий-амалий конференция бўлиб ўтди. Айни пайтда Европа мамлакатлари бўйлаб сафар қилаётган президент Алмазбек Атамбаев конференция қатнашчиларига мурожаат йўллади.

Алмазбек Атамбаев 2005 йил 24 март кунги инқилоб Аскар Акаевнинг нотўғри сиёсати оқибатида юз берганин таъкидлаб, уни 15 йил ичида мамлакат иқтисодиётини таназзулга учратиш ва халқни қашшоқликка туширганликда, миллий бойликларнинг талон қилинишига йўл қўйиб берганликда айблади.