Шаҳрисабздаги Тагичинор ва Гулистон маҳаллалари ҳудудидан Темурийлар даврига мансуб сангтарошлик намуналари ҳамда қурилиш ашёлари топилди. Улардан бири ҳозиргача яхши сақланган қабртошдир. Ундаги битиклар ўрганилганда, у Умаршайх Мирзонинг ўғли Саййид Аҳмад Мирзога тегишли эканлиги маълум бўлди.
— Кейинги йилларда Шаҳрисабз шаҳрининг Темурийлар ҳукмронлиги йилларидаги тарихий топографиясини аниқлаш, ўз даврида шаҳар ўтмишида алоҳида аҳамият касб этган шахслар фаолиятини ўрганиш мақсадида қатор археологик тадқиқотлар олиб борилмоқда, — дейди Қашқадарё вилояти ўлкани ўрганиш музейи директори Баҳодир Мамадиев. — Изланишлар шуни кўрсатмоқдаки, ушбу ҳудудда X-XIV асрларда масжид бўлган. Айни пайтда тарихий ашёларни тадқиқ этиш орқали қимматли маълумотларни қўлга киритаяпмиз.
Маълумот учун: 1996 йилда археологик қазишмалар жараёнида айнан шу ерда X-XIV асрларга оид пишган ғиштлардан терилган йўлак ва кулоллик буюмлари топилган эди.