Ўзбекистон автомобил ва дарё транспорти агентлигининг маълум қилишича, жорий йилинг биринчи чорагида автотранспорт соҳасида лицензиялашдан жами 9 млрд. 443 млн. сўмлик давлат божи ундирилди, бу ўтган йилнинг шу даврига нисбатан 10,9 фоизга кўпдир.
2015 йилнинг дастлабки уч ойида 9 та хўжалик субъектининг автотранспорт фаолияти текширилди ва ушбу корхоналарда лицензия талаблари ҳамда шартлари бузилиши ҳолатлари, жумладан лицензиясиз автотранспорт фаолиятидан даромад олингани ҳақидаги ҳолатлар аниқланди. Лицензиясиз автотранспорт фаолиятини амалга оширган хўжалик субъектларини текшириш материаллари тегишли чора кўриш учун солиқ органларига топширилди.
Шунингдек, йўл ҳаракати хавфсизлиги давлат хизмати ва солиқ органлари билан ҳамкорликда йўлларда 1130 та қўшма рейдлар ўтказилди. Лицензиясиз фаолият кўрсатган 4372 та автотранспорт эгаларидан солиқ ва суд органлари орқали жами 4 млрд. 415 млн. сўм миқдорида молиявий жарималар ундирилди.