Бошқа мавзулар“Вой, худойимга шукр, худойимга шукр. Воой, яхши бўлибди-я… Энди қариндош-уруғлар бир-биримизникига телеграммасиз қатнай эканмизда-а?! Фақат “Дўстлик” очилган бўлса ҳам шукр. Телеграммаси йўқ бўлса бўлди. Суюниб кўзларим ёшга тўлди…”
Бу 1984 йили Ўзбекистоннинг Шахрихонига Қирғизистондан келин бўлиб тушган Малика Норматованинг “Озодлик” журналистидан чегаранинг очилгани ҳақида илк бор эшитган вақтдаги хаяжонлари…
Қариндош-уруғларини узоқ вақтдан бери кўрмаган, Ислом Каримов режими вақтида ёпилган Қирғизистон билан чегараларнинг очилишини эшитиб хаяжонга тушган ўзбекистонликларнинг муносабатларини “Озодлик”нинг қирғиз хизмати тайёрлаган лавҳада тинглаб кўринг.
Уларнинг хурсандчиликларини туюб, беихтиёр кўзингизга севинч ёшлари келади.
Ишонмасангиз, тинглаб кўринг.
(Аудионинг матни)
Яна бир суҳбатдошимиз Наргиза Худойқулова. Қўқон шаҳридан. У Ўзбекистон лидери Шавкат Мирзиёевнинг Қирғизстонга сафари ҳақида эшитиб, яхши янгиликдан умид қилаётгани, шу боис фақат телевизорга термулиб ўтирганини айтди.
Наргиза опанинг қўлида ўзбек паспорти йўқ. “Ўзбекистонда яшайди” деган гувоҳнома билан юради:
– Кечқурун кўрдим. Президентлар учрашаётганини кўриб, роса хурсанд бўлиб йиғладим. Роса соғинганман. Зерикканман. Зўрға юрибман. Кеча эшитганимдан кейин умуман чидамай қолдим… Ош дамлаяпман, келинглар.
Андижон шахрига Ўшдан Совет даврида кўчиб борган Орзиқул Мадалиевнинг қизлари Қирғизистонга турмушга чиқишган. Орзиқул Мадалиев қизларини кўрмаганига етти йилга яқинлаб қолибди. У “Дўстлик” пункти очилгани ҳақидаги хабарни Озодлик мухбиридан эшитди:
-Чегара очилди дейсизми? Йўғе? Яхши бўпти-да!
Наманган вилоятининг Учқўрғон тумани Қирғизстонга яқин. У жойда яшаганлар Ўзбекистон телеканалларидан ташқари Қирғизистоннинг телеканалларини ҳам кўришади.
Учқўрғон туманида яшовчи Ибодатхон 1995 йилда Қирғизистоннинг Новкент туманидан келин бўлиб борган. У икки давлат ўртасидаги яхшиланиб бораётган алоқани телевизордан кўриб, радиодан тинглаб жуда ҳам хурсанд бўлганини айтди:
-Хаммамизга қуллуғ бўлсин! Кеча телевизордан чала эшитгандим. Бугун ўғлим ишдан келиб, “Дўстлик” очилибди, паспорт билан ўтаверса бўларкан, деди. Яхши бўлди. Энг аъло янгилик. Шундай турсин-да энди.
Кейинги суҳбатдошимиз Фарғона шаҳридан. Ёши олтмишдан ўтиб қолган Рамзия Мансурова ҳам Қирғизстондан бир пайтлар келин бўлиб келган. Она юртига узатган қизи эса Бишкекда яшаркан:
-Ҳайрият! Ҳозиргина болам “президентларимиз учрашибди, йўлларни очишворса-я” деганди. Йўл очилган бўлса, Бишкекка бораман, -деди Рамзия Мансурова.
Ўзбекистон президенти Шавкат мирзиёев 5-6 сентябрь кунлари Қирғизистонга давлат ташрифи билан келган эди.
Энди икки халқ вакиллари чегара постидан 24 соат давомида шахсни тасдиқловчи ҳужжат асосида бемалол ўтиш имконига эга бўлди
