АҚШнинг Forbes журнали энг бой 400 америкаликнинг 2017 йилги рўхатини чоп этди. Янги рейтингдан ўрин олган энг омадсиз киши АҚШ президенти Дональд Трамп бўлди. Сабаби, у бир йил ичида 600 млн доллар йўқотиб, давлати 3,1 млрд долларни ташкил қилган. Трамп бу кўрсаткич билан рўйхатда 248-ўринни эгаллади.

Энг бой америкалик эса яна Microsoft асосчиси Билл Гейтс бўлди. Бир йил ичида унинг давлати 8 млрд долларга кўпайиб, 89 млрд долларга етган.

2-ўринни Amazon интернет-гиганти ва Blue Origin аэрокоинот компанияси асосчиси Жефф Безос эгаллади, унинг бойлиги бир йил ичида 14,5 млрд долларга кўпайган. Етакчи учликни сармоячи ва Berkshire Hathaway бош директори Уоррен Баффетт якунламоқда, унинг бойлиги бир йил ичида 12,5 млрд долларга кўпайиб, 78 млрд долларга етган.

Етакчи бешликдан Facebook асосчиси Марк Цукерберг (ўсиш 15,5 млрд доллар, умумий давлат 71 млрд доллар) ва Oracle компанияси директорлар кенгаши раиси ва ҳамасосчиси  Ларри Элисон (ўсиш 9,7 млрд доллар, умумий давлат 59 млрд доллар) ҳам ўрин олишди.

Ушбу рўйхатга кириш чегараси 2017 йилда рекорд миқдордаги 2 млрд долларга етди. Шунингдек, АҚШнинг энг бой 400 кишисининг умумий бойлиги ҳам рекорд миқдорга етди, бу қиймат 2,7 трлн долларни ташкил қилди. Рўйхатдаги ўртача бойлик миқдори 6,7 млрд долларни ташкил қилди.

Рейтингнинг энг ёш вакили Snapchat дастурининг ҳамасосчиси, 27 ёшли Эван Шпигель бўлди, унинг давлати 3,1 млрд долларга баҳоланди. Энг кекса миллиардер эса 94 ёшли девелопер Алекс Спанос (2,4 млрд доллар) бўлди. Энг бой аёл Walmart савдо тармоғи эгаларидан бири Элис Уолтон бўлди. У 38,2 млрд долларлик бойлик билан рўйхатдан 13-ўрин олди.

Нашрнинг таъкидлашича, рекорд қийматлар ўрнатилишига сабаб кучли фонд бозори бўлган, у 2017 йилда бир неча рекорд қийматларни ўрнатди. Журнал бунинг исботи сифатида S&P 500 индекси ўсишини мисол қилиб келтирди, унинг қиймати Forbes’нинг аввалги нашри чоп этилган вақтдан бери 17 фоизга ўсган.

Мақола kun.uz сайтидан олинди