Бошқа мавзулар
Нью-Йорк суди Ўзбекистоннинг 29 ёшли фуқароси Сайфулла Соиповга терроризм ва террор ташкилотларига пул билан ёрдам бериш айбини қўйди: у машинаси билан 8 кишини босиб ўлдирди ва яна 12 кишига жароҳат етказди.
Соипов судда баёнот бериб, тавба қилмаслигини ва “янада кўпроқ” одамларни ўлдириш ниятида эканлигини айтди.
Нью-Йоркдаги террор ҳодисаси 31 октябрь куни юз берди. Судда ҳибсга олинган Ўзбекистон фуқароси ҳужум учун санани атайлаб танлаганини айтди: Хэллоуин байрамини нишонлаш учун шаҳар кўчалари одамлар билан тўла бўлади.
Унинг таъкидлашича, ўзининг бу ишига “бир йилга яқин”, тайёргарлик кўрган, бевосита тайёргарликка эса икки ой вақт сарфлаган. У қилмишидан пушаймон эмаслигини ва тавба қилмаслигини айтди. Балки: унинг сўзларига қараганда яна кўпроқ одамларни машинаси билан босиб кетишни ва Бруклин кўпригига қадар боришни режалаштирган, аммо тасодифан автобусга бориб урилган.
Судда Соипов ногиронлар аравачасида пайдо бўлди ва операциядан сўнг ўзини яхши ҳис қилаётгани ҳақида баёнот берди. У ўзига ўзи гувоҳлик бериш хуқуқидан воз кечди ва очиқдан очиқ ўзининг ҳатти-ҳаракатларини ИШИД ҳақида видео кўрганидан сўнг илҳомланиб амалга оширганини айтди. У юк машинасини 22 октябрь куни ижарага олган ва шу машинада кўчалардаги вазиятни ўрганган ва Хэллоуин байрамига ҳужум қилиш режасини ишлаб чиққан.
У шифохонадаги палатасига ИШИД байроғини осиб қўйишларини сўради.
Соиповга қотилик ва бир неча кишини ўлдиришга интилишдан ташқари, полиция унга нисбатан террор ташкилотларини моддий қўллаб-қувватлаш айбини ҳам қўйди, унинг бу ташкилотларга пул ўтказиб тургани айтилмоқда.
Тошкентлик Соипов Америкага 2010 йилда гринкарт лотереясини ютиб олганидан сўнг келган. Ўшанда у 21 ёшда эди. У аввалига Флоридада, сўнг Огайо ва кейинги йилларда Нью-Жерси штатининг Паттерсон шаҳрида истиқомат қилган. АҚШдаги танишлари уни молиявий муамммолари бўлган тажжавузкор ўсмир эканини айтишар экан, радикал исломий дунёқарашда бўлмаганини таъкидлашмоқда.
Тошкентда Соиповлар оиласи ўзига тўқ бўлгани ва диний оила бўлмагани айтилади. АҚШга боришидан аввал йигитча молия институтини тамомлаган ва Тошкентдаги меҳмонхоналардан бирида бухгалтер бўлиб ишлаган
Таҳминларга кўра, Соипов АҚШга келгач, “жиҳодчи”лар ғоялари билан таниша бошлаган.
Бундан аввал Федерал Тергов бюроси террор ҳодисаси билан боғлиқ яна бир Ўзбекистон фуқароси – 34 ёшли Муҳаммадзоир Қодиров қидирилаётганини маълум қилган эди. Кеча идора вакиллари у топилганини тасдиқлашди. Аммо у ҳақда қўшимча маълумлотларни беришдан воз кечишди.
