Бемаврид ажал қалбимизни тиғлади

Яна бир фожеа рўй берди. Яна бир ҳалокат ўзбекистонликларнинг руҳиятини сўндирди, кайфиятини талатум, кўнглини хонавайрон қилди. Яна бир даҳшатли хабар узоқ-узоқларда рўзғор тебратиш, оилани боқиш илинжида юрган элдошларимиз, юртдошларимизнинг яқинлари — ота-онаси, ёри, дўст-биродорлари, фарзандларию дилбандларидан ташқари буткул ўзбек халқини хавотирга буркади, ҳадикка гирифтор айлади.

Во-дориғ, бу не кўргулик, қўшни Қозоғистоннинг Оқтўбе вилоятида содир бўлган автобус ёнғинида биратўла 52 нафар ватандошларимиз нобуд бўлди. Билаги кучга, бели қувватга тўла ўғлонларимиз шаҳид кетди… Айни дамда ғамнок 52 оилага қўшилиб Ватанини, халқини, миллатини яхши кўрадиган аҳли Ўзбекия мусибат чекаётир. 52 нафар марҳумнинг орқасидан юз-юзлаб сағирлар, етимлар юм-юм йиғлаётир, бемаврид келган ажал барча-барчамизнинг қалбимизни тиғлаётир.

Аммо, аммо, аммо ана шундай оғир ва фожеага тўла кунларда ўзбек ҳукмрон доира вакилларининг товонига тош ботмаётир, аллақачон музга айланган юраклари эримаётир, пинаклари бузилмаётир, шаҳид кетган шунқорлари-чун заррача қайғурмаётир. Бу не кўргулик? Бу не боқибеғамлик? Бу не масъулиятсизлик? Нечун ўзбек ҳукумати фожеа қурбони бўлганлар учун мотом тутмаётир? Нега бу кунни мотам куни, дея эълон қилмаётир? Нега оинаижаҳону радиоканалларимиз аҳли ўзбекка бир оғиз таъзия билдириш, кўнглилларини кўтариш, синиқ қалбларига далда бериш ўрнига куй-наволарни, кўнгилочар кўрсатувларни аюҳаннос қилаётир? Ахир, биз бир кунда 52 нафар фуқаромиздан жудо бўлиб турибмизку! Наҳотки, элимизда халқ ва давлат учун қайғурадиган зот қолмаган? Бу не шармандагарчилик?

Эй, Яратган Эгам, ўт балосига гирифтор бўлган марҳумларни ўз раҳматингга муносиб кўр!  Юртдошларимизни нон ва пул дардида ноиложликдан Ўзбекистонимизни ташлаб, ўзга элларга, боши оғған томонларга кетишга мажбур қилаётган йўлбошчиларимизга комил инсоф бер, диёнат бер, уларнинг басир кўзларини, сўқир қалбларини очишда имдод бер!

“Бирдамлик” Халқ Демократик ҳаракати Ўтганларни Яратганнинг ўзи раҳматига муносиб кўришини илтижо қилади. Шаҳид кетганларнинг жойлари жаннат, охиратлари обод бўлсин! Уларнинг яқинларига сабр тилаймиз.

“Бирдамлик” Халқ Демократик ҳаракати матбуот хизмати

Бўлишинг:

Муҳаррир танлови

Таниқли сиёсатчи баҳодир хон туркистоннинг таваллуд айёми

Азиз ватандошимиз, қадрдон БАҲОДИР ХОН ТУРКИСТОН! Мана шу унутилмас, шукуҳли дамларда сизни, навқирон ва шижоат ёши,  туғилган кунингиз билан чин қалбдан табриклаб, самимий ...

Ислоҳотларимизнинг ўзбек халқи учун кераклигини ўзбекистондаги бир туман мисолида исботлай оламиз

Кучли ғоя, кучли жамоа -- муваффақиятларимизнинг калити. Ислоҳотлар халқ манфаатига ишлаши учун ислоҳот режалари халқчил бўлиши керак! Ислоҳотлар режаси юқоридан пастга қараб ...

“ муҳолифат ичидаги энг мард муҳожир…”

Мен Баҳодир Хон Туркистон билан ёзувчи Эврил Турон қаламига мансуб “Афсона ва Ҳақиқат” эссеси орқали танишганман. “Алпомиш” достонининг оҳангларини(!) қалбимда уйғотиб, фикр ...