Бошқа мавзулар
Самарқанд вилоят, Пахтачи туманидаги Навоий кон-металлургия комбинати тасарруфидаги Қорақўтан конида ғайриқонуний 30 нафар олтин изловчи қутқарилди, ФВВ шахтани ёпиб ташлади.
Фавқулодда вазиятлар вазирлигининг Самарқанд вилоят бошқармаси расмийсига кўра, маҳаллий аҳоли жавобгарликдан қўрқиб, ноқонуний иш қилишгани учун воқеа ҳақида хабар бермаган. “Бизнинг ходимлар етиб борганда, 17 январь куни бир кишининг ўлиги кавлаб олиниб, дарҳол кўмилганини, 3 киши турли жароҳатлар олганини, лекин улар шифокорга мурожаат қилмаганини аниқлаган. Ходимларимиз шахтада бошқа одам қолмаганини аниқлагандан сўнг, кирадиган жойни бульдозер билан ёпиб ташлаган”, деди мулозим.
Қутқарилган йигитлардан бири дўстининг айтишича, олтин қидирувчиларнинг ҳалокатига тўсинлардан бирининг қулаши сабаб бўлган.
– Ўртоғимнинг айтишича, улар 200-300 метр узунликдаги, лабиринтдай бўлиб ётган шахтанинг ичига кириб, руда қазишга киришишган. Бу фойдаланиб, ишлаб чиқариш тўхтатилган ва ташлаб кетилган шахта. Унинг ичига кўзни ачиштирадиган қандайдир нарса сепиб кетишади экан. Булар эса, ҳимоя воситаларини тақиб киришган. Давлат ишчилари, шахтани томи тушиб кетмаслиги учун ҳар жойда тоғ жинсларидан табиий устун қолдиришади экан. Булардан қайси бири ана шу устунлардан биттасини синдириб руда олмоқчи бўлган экан, тепа тушиб кетибди. Тошу тупроқ йўлни ёпиб қўйибди. Кимнидир босиб қопти, кимдир қочишга улугурибди, қолганларни кейин чиқариб олишибди. Унинг айтишича, икки киши ўлган. Улардан бири Тома қишлоғидан, иккинчиси Султонобод қишлоғидан”, – дейди пахтачиликлардан бири.
Бироқ, расмий манбалар, яна бир киши бу воқеада ўлганини тасдиқламади..
Айни пайтда бу шахталарнинг эксплутацияси тўхтатилган ва шахталарнинг кириш йўллари ёпиб ташланган. Бу руда конга яқин бўлган, Зиёвуддин шаҳарчаси, Черёмушка посёлкаси ва Қарноқ ота деган қишлоқларда қўлбола цехларда ювилади ва номаълум шахсларга сотилади. Маҳаллий расмийларга кўра, Пахтачи туманида ишсизлик туфайли аҳолининг ярими ғайриқонуний олтин излаш билаш шуғулланади.
