Ўзбекистонда шифокорнинг бир бармоқ ишораси неча пул?

А.Ҳамидов Республика шошилинч тиббий ёрдам илмий марказининг (РШТЁИМ) Сурхондарё вилоят филиалида жарроҳ бўлиб ишларди. У манфаат кўриш мақсадида ўзининг хизмат вазифасига кирадиган муайян ишни бажариш ёки хизмат кўрсатиш эвазига товламачилик йўли билан ҳақ талаб қилиб, оқибатда ҳам­касб­лари олдида боши эгилди.

Иллюстратив фото

Жорий йилнинг июнь ойида фуқаро М.Абдуғаниева РШТЁИМ филиалига ўт пуфагида қаттиқ оғриқ ҳис қилаётганлигидан шикоят қилиб келади. Буни эшитган Анварнинг «кафти қичишиб кетади» ва беморни дарҳол палатага жойлаштиради. Беморни тегишли тиббий кўрикдан ўтказади ва ўт пуфагида тош борлигини айтиб, уни олиб ташлашдан бошқа чора йўқлигини тушунтиради. Бемор жарроҳлик операциясига рози бўлгач, А.Ҳамидов бармоғи билан бир ишорасини қилади. Ишоранинг қийматини 100 минг сўм, деб тушунган бемор, шифокорнинг «бир миллион сўм бўлади», деган гапидан кейин ўйланиб қолади. Бунча пулни тезда топишнинг имкони йўқ эди-да! Шундай бўлса-да, саломатлигини ўйлаб, пул топиш ҳаракатига тушади. Айтилган миқдордаги пулни топишнинг иложини қила олмагач, шифокорнинг тамагирлиги ҳақида ҳуқуқни муҳофаза қилувчи ор­ганга мурожаат қилишга мажбур бўлади.

Мазкур ҳолат юзасидан Бош прокуратура ҳузуридаги Департаментнинг Жарқўрғон туман бўлими ходимлари томонидан ўтказилган тадбир жараёнида А.Ҳамидов олдига шифо истаб келган бемордан талаб қилинган пулни олган вақтда ушланди.

Жиноят ишлари бўйича Термиз шаҳар суди томонидан А.Ҳамидовга қилмишига яраша жазо тайинланди.

Манба: “Ҳуқуқ” газетаси

 

Фаррошликнинг «ставка»си 1,5 миллионми?

Сарлавҳадан ажабланяпсиз-а? Рост, фаррошлик катта амал эмас, қуруқ маошдан бошқа «даромади» ҳам йўқ, илло билганга хайрли иш бу. Ахир тозалик ва озодаликка масъул бўлмоқ, шу орқали ҳалол ризқ топишда ҳикмат катта. Бироқ бизнинг ақлли қулоқларимизга бу вазифа негадир икки ёки учинчи «навли» ишдай эшитилаверади-да. Майли, бунақа гапларни қўйиб, эътиборни рўй берган воқеликка қаратсак.

Н. исмли аёл Бухоро вилояти Когон шаҳар ҳокимлиги «Аҳолини бандликка кўмаклашиш» марказига бош уриб келди. Марказнинг масъул ходими Ғ.М. ишсизликдан танг аҳволга тушаёзган фуқародан тама қилиши, жуда юмшоқ айтганда, инсофданми? Когон шаҳар Тиббиёт бирлашмасига фаррош вазифасига ишга жойлаштириб қўйиш эвазига бир ярим миллион сўм талаб қилганини қаранг?! Ишсизликдан бўлари бўлган, бошқа чораси йўқ, деган хаёлга боргандир-да, ноинсоф!

Йўқ, чораси бор. Чораки, Ғ.М.га ўхшаш  кимсалар бундай вазифада ўтирмаслиги керак. Бунинг учун тегишли органга мурожаат қилиш кифоя. Аёл шундай қилди. Натижада 2018 йил 13 ноябрь куни Ғ.М. ўз хизмат хонасида фуқаро Н. дан 1 500 000 сўм пулни олган вақтда Бош прокуратура Департаментининг Когон тумани бўлими ходимлари томонидан ушланди…

Айни пайтда жиноят иши қўзғатилиб, тегишли процессуал ҳаракатлар олиб борилмоқда.

Манба:Хабар.уз

 

Тадбиркорнинг ҳафсаласини пир қилиш кимга керак бўлиб қолди?

Ғиждувонлик тадбиркор Акмалжон Ҳалимов эзгу ташаббусни илгари сурди, аммо кимлардир унинг ҳафсаласини пир қилди…

Гап шундаки, у бундан 8 ой муқаддам туман марказида “Доно чемпион” деб номланган нодавлат мактабгача таълим муассасасини барпо этди. Қаровсиз ҳолда ётган бино ўрнида замонавий боғча қад ростлади. Ўзбек хонадонини эслатувчи масканда болажонлар учун барча қулайлик яратилган.

Иллюстратив фото

— Ёшлигимда хорижий тилларни чуқур ўрганиш имконияти бўлмаган, — дейди у. — Шунинг важидан ҳаётда кўп бор қийналганман. Тадбиркор бўлсам, албатта, боғча очаман, фарзандларимизнинг хорижий тилларда ҳам бийрон сўзлаша олишлари учун зарур шарт-шароитни яратаман, дея ният қилгандим. Президентимизнинг нодавлат таълим муассасалари барпо этиш тўғрисидаги қарори орзуим рўёби сари йўл очди. Муассасамиз рус ва инглиз тилларини ўргатишга ихтисослаштирилган. Ҳозир бу ерда 15 та иш ўрни яратилган, 80 нафар ўғил-қиз тарбияланмоқда. Уларнинг шу кунги талаблар асосида таълим-тарбия олишлари учун, ҳатто, Бухоро шаҳридан етук кадрларни жалб қилганмиз. Мақсадимга етганимдан хурсандман.

Аммо сал илгари айтганимиздек, тадбиркорнинг қувончи узоққа чўзилмади. А. Ҳалимов нодавлат таълим муассасасини давлат-хусусий шериклиги асосида 180 ўринга мўлжаллаб кенгайтираётганди. Шунга кўра, “Доно чемпион” лойиҳа-смета харажати 3 миллиард 700 миллион сўм қилиб белгиланди. Шунинг 1 миллиард 500 миллион сўми ўзининг, қолган 2 миллиард 200 миллион сўми эса кредит ҳисобидан қопланиши керак эди.

— “Ипотека-банк” “Сардор” филиали мутахассислари бинони кўриб, қайта ҳисоблашди ва 1 миллиард 700 миллион сўм миқдорида имтиёзли кредит ажратилишини айтишди, — дейди ишбилармон. — Боғчани қуришда давом этдим. Банк билан кредит шартномаси туздим. Шу сумма учун банк суғурта ҳам қилдирди. Амалда эса менга 1 миллиард 180 миллион сўм миқдорида имтиёзли кредит берилди. Маблағнинг қолган қисмини, яъни 520 миллион сўмни олганимда муассасамиз биноларини тўлиқ таъмирлаган бўлардик. Натижада тарбияланувчилар сони 180, ишловчилар эса 33 нафарга етарди…

Тадбиркорни тингларканмиз, беихтиёр яқинда ўтган халқ депутатлари Ғиждувон тумани Кенгаши сессияси ёдга тушди. Олий Мажлис Қонунчилик палатаси ҳамда Сенати вакилларидан иборат ишчи гуруҳи томонидан ўрганилган қатор масалалар муҳокама қилинган ушбу тадбирда болаларни мактабгача таълим муассасаларига жалб қилиш даражаси пастлиги, тумандаги 25 та маҳаллада бундай муассаса йўқлиги танқид қилинганди.

Шундай экан, эзгу ташаббус билан майдонга чиққан тадбиркорни ҳар томонлама қўллаб-қувватлаш,уни янги марраларга руҳлантириш шу кунги ҳаётий масала эмасми?!

Хўш, тадбиркорнинг ҳафсаласини пир қилиш кимга керак бўлиб қолди?!

Муаллиф:Истам ИБРОҲИМОВ,
Манба:“Халқ сўзи”

 

Обунага ўқувчиларни мажбурлаб зўравонлик орқали пул йиққан ўқитувчи лавозимидан озод этилди

Фарғона вилояти Бувайда тумани 3-умумий ўрта таълим мактаби ўқитувчиси ўқувчиларни ҳақоратлагани, камситгани ва калтаклагани учун эгаллаб турган лавозимидан озод этилди, дея хабар қилди Халқ таълими вазирлиги Ахборот хизмати.

Фото:uzedu.uz

Маҳаллий ОАВ вакиллари Бувайда тумани 3-умумий ўрта таълим мактабида синф раҳбарлари ва фан ўқитувчилари томонидан турли мақсадларга пул йиғилгани, пул бермаган ўқувчиларни ҳақоратлаш, калтаклашлар тўғрисида маълумотлар чоп этилган эди.

Ўзбекистон Халқ таълими вазирининг Ҳуқуқий-назорат хизмати чоп этилган материаллар юзасидан текширув ўтказди.

Текшириш натижасида 2018 йилнинг 16 ноябрь куни мактабнинг 7-В синф раҳбари Р. М. шу синфда маънавият соати ўтиш жараёнида икки ўқувчиларга нисбатан ноқонуний хатти-ҳаракатлар содир этгани, яъни обунага пул бермаганликлари учун синф ўқувчилари олдида ҳақоратлаб, камситган ва калтаклаганлиги аниқланди.

Фарғона Халқ таълими бошқарма бошлиғининг буйруғига асосан, ўқитувчи Р.М. ва Маънавий-маърифий ишлар бўйича мактаб директори ўринбосари Х.А. эгаллаб турган лавозимларидан озод этдилар.

Мактаб директори Р.А.га эса интизомий чора кўрилди.

Фарғона Халқ таълими бошқармаси маҳаллий ҳокимият билан ҳамкорликда ўқув муассасасини кўмир ёки кўмир брикети билар таъминлаш учун керакли чоралар кўрмоқда.

Ўзбекистон Халқ таълими вазирлиги зўравонликнинг барча кўринишларини қоралайди ҳамда ўқитувчилар, ўқувчилар ва уларнинг ота-оналарини босиқликка ва ўзаро келишмовчиликларни тинч йўл билан ҳал этишга чақиради.

Халқ таълими вазирлиги мактаб ходимларини ота-оналардан турли мақсадлар учун ноқонуний маблағлар йиғиш амалиётини тўхтатишни сўрайди.

 

“Ўзбекистон ҳаво йуллари” монополиясига барҳам берилади, компания иккига ажратилади

“Ўзбекистон ҳаво йўллари” миллий авиакомпанияси базасида Uzbekistan Airways ва Uzbekistan Airports акциядорлик жамияти ташкил этилади. Бу ҳақда Ўзбекистон Президенти Шавкат Мирзиёевнинг “Ўзбекистон Республикаси фуқаро авиациясини тубдан такомиллаштириш чора-тадбирлари тўғрисида”ги Фармонида қайд этилган, дея ёзмоқда “Халқ сўзи” нашри.

Ҳужжатга кўра, миллий авиакомпания қошида Uzbekistan Airways ва Uzbekistan Airports (аэропортни назорат қилиш бўйича) акциядорлик жамиятлари тузилиши белгилаб қўйилган ва уларнинг асосий вазифалари белгилаб берилган.

Компания матбуот хизматининг хабар беришича, ҳужжат билан авиакомпания тизимидаги давлат унитар корхоналари масъулияти чекланган жамият шаклига ўтказилади. Жумладан самолётларга техник ёрдам кўрсатувчи Uzbekistan Airways Technics ҳам МЧЖ шаклида қайта ташкил қилинади.

“Ўзаэронавигация маркази” эса Вазирлар Маҳкамаси тасарруфига ўтказилади. “Махсус авиацион ишлар бўйича авиакомпания” базасида “Uzbekistan Helicopters“ МЧЖ ташкил қилинади.