Туркманистон тожик юкларини ўтказмаяпти

Туркманистон чегарасида Тожикистон юклари билан боғлиқ вазият ўзгаришсиз қолмоқда: туркманистонлик божхоначилар Тожикистон учун мўлжалланган ёки Тожикистондан экспорт қилинган юкларни ўз ҳудудига ўтказмаяпти. Бу ҳақда Кун.Уз нашри Asia-Plus маълумотига асосланиб хабар берди.

Фото:gdb.rferl.org

 

Маълумотга  кўра, Тожикистон юклари бўлган машиналар Туркманистон-Эрон ва Туркманистон-Ўзбекистон чегарасида август охиридан бери турибди.

«Вазият ўзгармади, юклар Туркманистон билан чегарада турибди, улардан баъзилари эса Озарбойжон чегараси томон ҳаракатланмоқда, бу Тожикистонга Қозоғистон ва Ўзбекистон ҳудуди орқали етиб олиш учун қилинмоқда», – дея хабар беришган Тожикистон Транспорт вазирлигидан.

Аввалроқ, Тожикистон Транспорт вазирлиги юк машиналар ҳайдовчиларига муқобил йўллардан фойдаланиш тавсия қилди: Бокуга бориш, у ердан Каспий денгизи орқали паромда Қозоғистоннинг Ақтау портига йўл олиш ва Қозоғистон ҳамда Ўзбекистон орқали Тожикистонга бориш.

Оқтўбеда Ўзбекистон фуқаролари ёниб кетган автобусни бошқарган ҳайдовчининг даҳшатли кўрсатмалари

Қўшни Қозоғистон Республикасининг Оқтўбе вилоятида ёниб кетган ва 52 нафар ўзбекистонликлар умрига зомин бўлган автобус ҳайдовчиси рўй берган воқеанинг аниқ-таниғини гапириб берди, дея хабар тарқатмоқда NUR.KZ.

Фото: meduza.io

Оқтўбе вилояти трассасида Ўзбекистон фуқаролари билан рўй берган фожеали ишга алоқадор барча шубҳали шалоқад билан бошланган тергов ишлари давом этмоқда. Бугун ушбу воқеага тегишли автобус ҳайдовчиси Пернебековга ёрдамлашган Барат Тангатов жавоб берди. У Россиядан автомобиль сотиб олиш учун автобусда йўловчи сифатида кетаётган экан.

 

Тангатовнинг сўзларига қараганда, 18 январь куни кун жуда қаттиқ совуқ бўлган. Боз устига автобус соляркаси сифатсиз бўлиб, автобус йўл ўртасида тўхтаб қолган. Йўловчилар изғирин совуқдан совуқ қота бошлаган. Ҳайдовчилар салонда бензин билан бирга пуркагич шамдан фойдаланиш хавфли эканлигини билса-да, уни шу куни ким ёққанини сезмаган. Улар бу ишда ўзларини айбсиз деб ҳисобламоқда. “Мен эрталаб соат 7:30-да уйғонган чоғимда шам ёнаётганини, атрофида бир неча йўловчилар исиниб ўтирганини кўрдим. Шу пайтда мен уларга ўша шамдан фойдаланиш хавфли эканини айтдим. Сўнгра бизни олиб кетадиган автобус топиб, тўхтатиш мақсадида ташқарига чиқдим. Менинг кетимдан Қирғизбоев Мақсат ҳам чиқди. Пернебеков бу пайтда ухлаётган эди” , – деди Барат Тангатов.

 

Икки нафар ҳайдовчи ташқарига чиққан пайтда автобусда ёнғин бошланиб кетди. Одамлар 7-10 минут ичида ёниб кетди. “Кимдир пуркаловчи шамни оёғи билан туртиб юборганга ўхшайди. Шими ёнаётган йўловчи югуриб ташқарига чиқди. Унинг орқасидан яна бир йўловчи югуриб чиқди. Уларнинг орқасидан яна бир йўловчи ва Мақсат Пернебеков эргашди. Эшик очилганда ичкарига кирган шамолдан олов ловуллаб кетди. Ёнғин бирпасда автобусни тўлалигича забт этди. Автобуснинг ичини тўла қора тутун қоплаб қандайдир ёқимсиз ҳид тарқалди. Ҳеч нарса кўринмайди. Биз автобуснинг ойналарини синдириб сакранглар, деб бақирдик. Салондан бақир-қичқир овозлар чиқса-да, ҳеч ким ташқарига сакрамади”, – деди Тангатов.

 

Ўзбекистонлик 52 нафар юртдошларимизнинг фожеали ўлимига доир суд ишлари давом этмоқда. Ана шу аянчли воқеадан кейин ҳам ўзбекистонликлар узоқ Россияга Қозоғистон орқали кетишга чек қўймаётир. Бунга Ўзбекистондан Россияга йўловчи ташувчи автобуслар қўйилмагани, йўналишдаги мавжуд автобус, поезд, самолётларнинг нархи ниҳоятда қимматлиги сабаб бўлмоқда. Ўзбекистон ҳукумати айнан мана шу ёнғиндан кейин Ўзбекистон ҳаво йўлларида чипта нархини арзонлаштиришга, поездлар қатновини йўлга қўйишга ва уларда чипта нархини арзонлаштиришга ваъда берган эди. Бироқ ушбу ваъда ҳам одатдагидек ваъдалигича қолди. Ўзбекистондан Қозоғистон орқали иш излаб кетувчи меҳнат муҳожирлари сони худди илгаригидек кўплигича қолди. Меҳнат муҳожирларига эса ҳукумат томонидан амалда ҳеч қандай ёрдам кўрсатилмаётир. Ҳамма ҳолатлар эски ҳаммом, эски тослигича қолмоқда.

 

Муаллиф: Рўзибой Азимий

Туркманистонда «халқ оқсоқоли»нинг навбатсиз нон олишга уриниши муштлашувга олиб келди

14 сентябрь куни Дошўғиз вилоятидаги ун заводи яқинидаги дўкон олдида нон учун навбатда турганлар ўртасида муштлашув юз берди.

«Дошўғиз шаҳридан келган тўрт нафар оқсоқол навбатсиз нон сотиб олмоқчи бўлишганида одамлар уларга қарата бақира бошлашди. Уларга қарата “мамлакатни сиз шу даражага келтириб қўйдингиз, сиз туфайли одамлар бир бурда нон топа олмай қолди. Сиз халқ оқсоқоли эмас, ўз қорнингизни оқсоқолисиз» дея ёпирила кетишди, – дея хабар беради “Озодлик» мухбири ҳодиса гувоҳларининг сўзларига таянган ҳолда.

«Озодлик» юз берган ҳодисага ойдинлик киритиш мақсадида кекса бу тўрт кишининг шахсини аниқлай олмади.

Кузатувчиларнинг фикрича, Туркманистон мустақилликка эришганидан бери «яшули» (оқсоқол) институтидан мамлакат раҳбарияти томонидан давлатни бошқаришда муҳим инструмент сифатида фойдаланиб келган.

Шу билан бирга “Озодлик»нинг Дошўғиздаги мухбири минтақада нон етишмаслиги билан боғлиқ вазият ҳақида хабар беради. «Халқ қийналиб қолди. Ун умуман йўқ. Халқ оч қолган», -дейди мухбир.

Июнь ойида «Озодлик» мухбирлари Дошўғиз вилоятининг Болдумсаз этрапида нон харид қилувчилардан паспортларни кўрсатиш талаб қилинаётгани ҳақида хабар берган эди.

Туркманистон давлат ОАВ мамлакатда давом этаётган инқироз ҳақида эслатмайди, балки мамлакатда озиқ-овқат мўл-кўлчилиги ҳақида маълум қилади.

Манба:Озодлик

 

Минтақадаги 4 мамлакат мусулмонлари идоралари ҳамкорлик қилиш бўйича битим имзолади

Қирғизистон, Ўзбекистон, Қозоғистон ва Тожикистон мусулмонлар идоралари келгусида ҳамкорлик қилиш бўйича битим имзолади. Бу ҳақда Озодлик радиоси маълум қилди.

Қирғизистон, Ўзбекистон, Қозоғистон ва Тожикистон мусулмонлар идоралари раҳбарлари Тошкентда учрашди. 2018, 13 сентябрь.

Қирғизистон муфтияти хабарига кўра, ҳужжат ташкилотлар ўртасидаги ўзаро алоқаларни мустаҳкамлаш, тажриба алмашиш, ислом, шу жумладан, ханафия мазҳаби қадриятларини ёйиш бўйича саъй-ҳаракатларни бирлаштиришга йўналтирилган.

Тўрт мамлакат муфтиятлари таълим тизимини яхшилаш, зиёратлар ташкил этиш ва Ҳайит кунларини белгилаш масалаларида биргаликда ишлашмоқчи. Бундан ташқари, келишув ислом туризмини ривожлантириш ва мамлакатлар ўртасида дўстликни мустаҳкамлашни ҳам ўз ичига олади.

Қирғизистон, Ўзбекистон, Қозоғистон ва Тожикистон аҳолисининг кўпчилик қисми мусулмонлар бўлган собиқ иттифоқ республикаларидир.

 

Қирғизистон Қозоғистон элчисига норозилик нотаси топширди

Қирғизистон ташқи ишлар вазири Эрлан Абдилдаев Қозоғистонда қирғизистонликларнинг ёппасига текширилиши юзасидан Қозоғистоннинг Қирғизистондаги элчиси Карим Кокрекбаевни учрашувга таклиф қилди. Бу ҳақда Қирғизистон ташқи ишлар вазири маълум қилди.

Таъкидланишича, Абдилдаев Кокрекбаевдан қирғизистонликларнинг Қозоғистон аэропортларида мутасадди идоралар амалдор шахслари томонидан текширилишига йўл қўйиб бўлмаслигига эътибор қаратишни қатъий сўраган.

Кокрекбаевга ушбу ҳолат юзасидан норозилик нотаси топширилган. Таъкидланишича, Қирғизистон ташқи ишлар вазирлиги вазиятни кузатиб, бу масала бўйича Қозоғистон билан ишни давом эттирмоқда.

Охирги бир неча ой давомида Қирғизистон фуқаролари Қозоғистон хавфсизлик хизматлари томонидан Қозоғистон аэропортларида, жумладан Олмаота аэропортида сўроқ қилинаётганларидан шикоят қилишмоқда. Қозоғистон томони ушбу текширувларни “инсон шубҳа туғдирган ҳолатда” “қонун доирасида” амалга оширилаётгани билан тушунтирмоқда.

Қирғизистонликлар уларни текшириш қатъийлаштирилганидан шикоят қилишмоқда. Аэропортда улар алоҳида хонага олиб кетилиб, нима учун келганликлари, ишлаш жойлари ва лавозимлари ҳақида сўралмоқда ҳамда телефонларни текширилмоқда. Шикоятларга кўра, қирғизистонликлар 20-30 дақиқа давомида сўроққа тутилмоқдалар.

Таъкидланишича, кўплаб қирғизистонликлар бошқа давлатларга Олмаота аэропорти орқали жўнайдилар ва у орқали ортга қайтадилар. Бу Олмаота аэропорти Бишкекдаги “Манас” аэропортидан кўпроқ халқаро рейсга хизмат кўрсатиши билан боғланган. Бошқа давлатларда Бишкек аэропортидан учса ҳам бўлади, бироқ бунда пересадка қилишга тўғри келади, чипта эса қимматроққа айланади.

Манба:Кун.Уз